فوتو: ria.ru
اقش 11 ساۋىرگە دەيىن رەسەي مۇنايى مەن مۇناي ونىمدەرىنىڭ 12 ناۋرىزعا دەيىن كەمە ارقىلى جونەلتىلۋ كەرەك پارتيالارىن سانكتسيادان ۋاقىتشا شىعاردى. سايكەس مامىلەلەر جاساۋعا مۇمكىندىك بەرەتىن ليتسەنزيا 12 ناۋرىز كۇنى اقش قارجى مينيسترلىگىنىڭ سايتىندا جاريالاندى, دەپ حابارلايدى "ادىرنا".
مينيسترلىك باسشىسى سكوتت بەسسەنت بۇل شەشىم دونالد ترامپتىڭ باستاماسىمەن قابىلدانعانىن ايتتى. ونىڭ سوزىنشە، شارانىڭ نەگىزگى ماقساتى — الەمدىك ەنەرگەتيكالىق نارىقتاردىڭ تۇراقتىلىعىن قامتاماسىز ەتۋ جانە مۇناي باعاسىنىڭ كۇرت وسۋىنە جول بەرمەۋ.
بەسسەنت X الەۋمەتتىك جەلىسىندەگى جازباسىندا بۇل «تار باعىتتاعى جانە قىسقا مەرزىمدى قادام» ەكەنىن اتاپ ءوتتى. ونىڭ ايتۋىنشا، مۇنداي شەشىم رەسەي ۇكىمەتىنە ايتارلىقتاي قارجىلىق پايدا اكەلمەيدى. سەبەبى رەسەي بيۋدجەتىنىڭ نەگىزگى كىرىسى مۇناي ساتۋدان ەمەس، ءوندىرۋ ورىندارىندا الىناتىن سالىقتاردان قالىپتاسادى. سونىمەن قاتار ول مۇناي باعاسىنىڭ قازىرگى ءوسۋىن «ۋاقىتشا قۇبىلىس» دەپ باعالاپ، ۇزاق مەرزىمدە بۇل اقش ەكونوميكاسىنا ءتيىمدى بولاتىنىن ايتتى.
Fox News تەلەارناسىنىڭ مالىمەتىنشە، 12 ناۋرىزداعى جاعداي بويىنشا الەمنىڭ 30 ءتۇرلى نۇكتەسىندە رەسەيلىك مۇناي تيەلگەن تانكەرلەردە شامامەن 124 ملن باررەل مۇناي تۇرعان. بۇل كولەم، ەگەر كۇندەلىكتى تۇتىنۋ دەڭگەيىمەن ەسەپتەسە، شامامەن 5–6 كۇندىك جەتكىزىلىمگە تەڭ.
بۇعان دەيىن اقش ۇندىستانعا رەسەيلىك مۇنايدى ساتىپ الۋعا ءبىر ايلىق رۇقسات بەرگەن. 6 ناۋرىزدا بەسسەنت ۆاشينگتون تەڭىزدە تۇرعان رەسەيلىك مۇنايدى ءۇندىستاننىڭ 30 كۇن ىشىندە ساتىپ الۋىنا مۇمكىندىك بەرگەنىن مالىمدەگەن.
10 ناۋرىزدا وتكەن ءباسپاسوز كونفەرەنتسياسىندا ترامپ رەسەيگە قارسى سانكتسيالاردى ۋاقىتشا جەڭىلدەتۋ مۇمكىندىگىن دە جوققا شىعارماعان. ونىڭ ايتۋىنشا، مۇناي باعاسىن تۇراقتاندىرۋ ءۇشىن كەيبىر ەلدەرگە قاتىستى سانكتسيالار ۋاقىتشا توقتاتىلۋى مۇمكىن. ال ەگەر گەوساياسي جاعداي تۇراقتالىپ، بەيبىتشىلىك ورناسا، ولاردى قايتا ەنگىزۋدىڭ قاجەتى بولمايتىنىن ايتقان.
سوعان قاراماستان، 11 ناۋرىزدا G7 ەلدەرى يرانمەن بايلانىستى شيەلەنىس جاعدايىندا رەسەي مۇنايىنا سالىنعان سانكتسيالاردى تولىق الىپ تاستاماۋ جونىندە كەلىسىمگە كەلگەنى حابارلاندى. كەلەسى كۇنى اقش ەنەرگەتيكا ءمينيسترى كريس رايت رەسەيگە قاتىستى سانكتسيالاردى جەڭىلدەتۋ جوسپارى جوق ەكەنىن مالىمدەدى.
سوعىس جاعدايىنا بايلانىستى مۇناي باعاسىنىڭ ءوسۋى اقش-تى ستراتەگيالىق قورداعى مۇنايدى پايدالانۋعا يتەرمەلەدى. 12 ناۋرىزدا اقش ەنەرگەتيكا مينيسترلىگى 172 ملن باررەل مۇنايدى نارىققا شىعاراتىنىن جاريالادى. بۇل شەشىم حالىقارالىق ەنەرگەتيكالىق اگەنتتىك اياسىنداعى مىندەتتەمەلەردى ورىنداۋ ماقساتىندا قابىلدانعان.
ۇيىم جوسپارىنا سايكەس، 32 مەملەكەت، سونىڭ ىشىندە گەرمانيا, جالپى كولەمى 400 ملن باررەل مۇنايدى ستراتەگيالىق قوردان شىعارۋ ءتيىس.
