يران پرەزيدەنتى ماسۋد پەزەشكياننىڭ ماسكەۋگە ساپارى قارساڭىندا جان-جاقتى ستراتەگيالىق سەرىكتەستىك كەلىسىمىنە قول قويىلادى دەپ كۇتىلۋدە. ال يراننىڭ رۋحاني جەتەكشىسىنىڭ كەڭەسشىسى ءالي لاريدجاني رەسەيگە بىرنەشە رەت قۇپيا ميسسيامەن بارعان. بۇل تۋرالى «The Times» گازەتى 13 قاڭتار كۇنى جازدى، دەپ حابارلايدى “ادىرنا” ۇلتتىق پورتالى.
باسىلىمنىڭ مالىمەتىنشە، باتىس بارلاۋ قىزمەتى ءلاريدجانيدىڭ ساپارلارىنىڭ باستى ماقساتى - تەگەراننىڭ يادرولىق باعدارلاماسىن دامىتۋدا ماسكەۋدەن كومەك الۋ نيەتى دەپ سانايدى.
سونىمەن قاتار، باتىس بارلاۋ قىزمەتتەرى وكىلدەرىنىڭ ايتۋىنشا، يران رەسەيدەن سۋ-35 جويعىش ۇشاقتارىنىڭ جاڭا نۇسقاسىن الۋ جانە يزرايل جويعان پۆو جۇيەلەرىن قالپىنا كەلتىرۋدى ماقسات ەتىپ وتىر.
“ودان بولەك، تەگەران ماسكەۋدەن ليۆاننىڭ راديكالدى شيتتىك "حەزبوللا" قوزعالىسىن قارۋلاندىرۋدا كومەك الۋدى كوزدەۋدە، ونىڭ ارسەنالىن يزرايل جويعان بولاتىن”، دەپ جازدى The Times.
گازەتتىڭ حابارلاۋىنشا، ماسكەۋدە يران پارلامەنتىنىڭ بۇرىنعى توراعاسى جانە يسلام رەۆوليۋتسياسى ساقشىلار كورپۋسىنىڭ بۇرىنعى وفيتسەرى ءالي لاريدجاني ۋكرايناعا قارسى سوعىستا پايدالانۋ ءۇشىن رەسەيگە يراندىق ۇشقىشسىز ۇشاقتار مەن زىمىرانداردى جەتكىزۋ ماسەلەسىن تالقىلادى.
ايتا كەتسەك، 2024 جىلدىڭ ماۋسىم ايىندا رەسەي پرەزيدەنتى ۆلاديمير ءپۋتيننىڭ پحەنيانعا ساپارىنان كەيىن رەسەي مەن سولتۇستىك كورەيا اراسىندا ستراتەگيالىق سەرىكتەستىك تۋرالى كەلىسىمگە قول قويىلدى. ۇقساس قۇجات 17 قاڭتاردا ماسۋد پەزەشكياننىڭ ساپارى اياسىندا رف مەن يران اراسىندا دا جاسالۋى مۇمكىن.
