رەسەي پرەزيدەنتى ۆلاديمير پۋتين كاسپي قۇبىر كونسورتسيۋمىن (ققك) قورعاۋ ءۇشىن اۋە شابۋىلىنا قارسى قورعانىس (پۆو) جۇيەلەرى ورناتىلماعانىن مالىمدەدى، دەپ حابارلايدى "ادىرنا" ۇلتتىق پورتالى.
ونىڭ ايتۋىنشا، بۇل نىسان حالىقارالىق ەنەرگەتيكالىق ينفراقۇرىلىمعا جاتادى. سوندىقتان وعان شابۋىل جاسالمايدى دەپ ەسەپتەلگەن.
«بۇل نىساندا بۇرىن دا، قازىر دە اۋە شابۋىلىنا قارسى قورعانىس جۇيەلەرى بولعان جوق. سەبەبى تۇسىنىكتى، ءبىز بۇل نىسانعا شابۋىل جاسالمايدى دەپ ويلادىق. ويتكەنى بۇل – قاتاڭ تۇردە العاندا، رەسەيگە تيەسىلى نىسان ەمەس، حالىقارالىق ەنەرگەتيكالىق ينفراقۇرىلىمعا جاتاتىن نىسان»، – دەدى پۋتين.
ول ۋكراينا قارۋلى كۇشتەرىنىڭ ققك-عا جاساعان شابۋىلى ەۋروپامەن ۇيلەستىرىلگەن بولۋى مۇمكىن ەكەنىن ايتىپ، بىراق بۇل جاي عانا سايكەستىك بولۋى دا مۇمكىن ەكەنىن جەتكىزدى.
17 اقپاندا ۋكراينا قارۋلى كۇشتەرى ققك-نىڭ «كروپوتكينسكايا» مۇناي ايداۋ ستانتسياسىنا درونمەن شابۋىل جاساعان بولاتىن. ققك بۇل تۋرالى حالىقارالىق كونسورتسيۋمنىڭ بارلىق اكتسيونەرلەرىنە، ونىڭ ىشىندە اقش پەن ەۋروپا كومپانيالارىنا حابارلادى.
