قازاقستاندىق داۋرەن قابي وڭتۇستىك امەريكانىڭ ەڭ بيىك شىڭى – اكونكاگۋاعا كوتەرىلدى. ول بيىكتىگى 7 مىڭ مەترگە جۋىق تاۋعا ۇلتتىق مۋزىكالىق اسپاپ – دومبىرانى الىپ شىققان، دەپ حابارلايدى "ادىرنا" ۇلتتىق پورتالى.
بۇعان دەيىن داۋرەن قابي ەۆەرەستكە ورمەلەۋ كەزىندە ساۋساقتارىنىڭ بىرنىشە بۋىنىن ءۇسىرىپ العان.
اكونكاگۋا – ارگەنتينا مەن چيلي شەكاراسىندا ورنالاسقان وڭتۇستىك امەريكانىڭ ەڭ بيىك شىڭى. ونىڭ بيىكتىگى 6961 مەتردى قۇرايدى. بۇل تاۋ "7 شىڭ" باعدارلاماسىنا كىرەدى. وندا ءار قۇرلىقتىڭ ەڭ بيىك نۇكتەلەرىنە شىعۋ قاراستىرىلعان.
"دومبىرا – مەن ءۇشىن دالا رۋحىنىڭ، كوشپەندىلەردىڭ سيمۆولى. ول 2000 جىلدان استام ۋاقىت بويى قازاق مادەنيەتىنىڭ اجىراماس بولىگى بولىپ كەلەدى. ءبىز بۇل جولى شىڭعا بايراق الىپ شىققان جوقپىز. ويتكەنى باسقا مەملەكەتتىڭ جەرىنە تۋ تىگۋ – ەسكىرگەن ءداستۇر دەپ ويلايمىن. ال دومبىرا – مەنىڭ مادەنيەتىممەن بايلانىسىمدى بىلدىرەتىن سيمۆول. سوندىقتان ونى شىڭعا امان-ەسەن جەتكىزۋ مەن ءۇشىن ماڭىزدى بولدى،" – دەيدى داۋرەن قابي.
