كولىك ۆيتسە-ءمينيسترى تالعات لاستاەۆ 2024 جىلدىڭ جەلتوقسانىندا اقتاۋ ماڭىندا ورىن العان ءازىربايجان كومپانياسىنىڭ ۇشاعى اپاتىنىڭ سەبەبىن انىقتاۋعا قاتىستى تەرگەۋ قاشان اياقتالاتىنىن ايتتى، دەپ حابارلايدى "ادىرنا" ۇلتتىق پورتالى.
"حالىقارالىق ازاماتتىق اۆياتسيا ۇيىمى تالاپتارى مەن ۇسىنىلعان ستاندارتتارىنا سايكەس، تەرگەۋ ءبىر جىلعا سوزىلادى. وسىعان بايلانىستى، بيىلعى جەلتوقسان ايىنا دەيىن تەرگەۋ بويىنشا قورىتىندى ەسەپ اياقتالۋى ءتيىس", – دەدى لاستاەۆ ۇكىمەتتەگى بريفينگتە.
الايدا، ۆيتسە-مينيستر اۋە اپاتىنا قاتىستى قىلمىستىق ءىستىڭ تەرگەلۋى جونىندە پىكىر بىلدىرمەدى.
"قىلمىستىق تەرگەۋ – بۇل پروكۋراتۋرا ورگاندارىنىڭ قۇزىرەتىنە جاتادى. بۇل ماسەلە بويىنشا ارنايى جەدەل-تەرگەۋ توبى جۇمىس ىستەپ جاتىر", – دەپ مالىمدەدى ول.
ەسكە سالا كەتەيىك، 2024 جىلعى 25 جەلتوقساندا اقتاۋدا Azerbaijan Airlines (AZAL) اۋە كومپانياسىنا تيەسىلى Embraer ۇشاعىنىڭ قاتىسۋىمەن اۋە اپاتى ورىن الدى. باكۋ – گروزنىي باعىتى بويىنشا ۇشقان ۇشاق شۇعىل قونۋعا ارەكەت جاساعان كەزدە اپاتقا ۇشىرادى. بورتتا 62 جولاۋشى جانە 5 ەكيپاج مۇشەسى بولعان. اپات ناتيجەسىندە 38 ادام قازا تاپتى.
حالىقارالىق ازاماتتىق اۆياتسيا ۇيىمى كونۆەنتسياسىنا سايكەس، اپاتتى تەرگەۋ جۇمىستارىن قازاقستان باسقارادى. تەرگەۋگە ءازىربايجان، رەسەي ماماندارى، حالىقارالىق ساراپشىلار جانە Embraer وكىلدەرى قاتىسۋدا. قارا جاشىكتەر الىنىپ، حالىقارالىق ساراپشىلاردىڭ قاتىسۋىمەن شيفرىن شەشۋ پروتسەسى جۇرگىزىلۋدە.
