كاسپي قۇبىر كونسورتسيۋمىنىڭ (كتك) كراسنودار ولكەسىندەگى مۇناي ايداۋ ستانتسياسى دروندار شابۋىلى سالدارىنان اۋىر زاقىمداندى. ونىڭ جوندەلۋى 1,5-2 ايعا سوزىلۋى مۇمكىن. بۇل تۋرالى حالىقارالىق كونسورتسيۋمنىڭ رەسەيلىك اكتسيونەرى «ترانسنەفت» كومپانياسى مالىمدەدى، دەپ حابارلايدى “ادىرنا” ۇلتتىق پورتالى.
«كتك ماماندارىنىڭ پىكىرىنشە، اتالعان شابۋىلدىڭ سالدارىن 1,5-2 اي ىشىندە جويۋ جوسپارلانعان. بۇل قازاقستاننان ايدالاتىن مۇناي كولەمىنىڭ شامامەن 30%-عا تومەندەۋىنە اكەلۋى مۇمكىن…
شابۋىلدىڭ ناتيجەسىندە نىسانعا اۋىر زاقىم كەلدى: شاتىر بۇزىلدى، جابىق تاراتۋ قۇرىلعىسى، گاز تۋربينالىق قوندىرعىسى (گتق) زاقىمداندى، كابەلدەر مەن كابەل ەستاكاداسى، سۋ رەزەرۆۋارى، ەكى ترانسفورماتور، سۇزگىلەر مەن گتق ءورت ءسوندىرۋ جۇيەسى جويىلدى»، - دەپ اتاپ ءوتتى كومپانيا.
قازىرگى ۋاقىتتا «تەڭىز-نوۆوروسسيسك» ماگيسترالدىق مۇناي قۇبىرى ارقىلى مۇناي تاسىمالداۋ اپاتتىق سحەما بويىنشا ۋاقىتشا توقتاتىلعان “كروپوتكينسكايا” مۇناي ايداۋ ستانتسياسىن اينالىپ ءوتىپ جاتقانى حابارلاندى.
“كتك جۇيەسى بويىنشا 2024 جىلى تاسىمالدانعان مۇناي كولەمى 63 ميلليون توننا بولدى، ونىڭ 74 پايىزى امەريكالىق جانە باسقا دا باتىس جۇكتەرىنىڭ ۇلەسىنە تيەدى”، - دەپ مالىمدەدى «ترانسنەفت».
«كونسورتسيۋمنىڭ الەمدىك ەنەرگەتيكالىق قاۋىپسىزدىكتى قامتاماسىز ەتۋدەگى جانە قاتىسۋشى ەلدەردىڭ ەكونوميكالىق مۇددەلەرىن جۇزەگە اسىرۋداعى ءرولى بارلىق كتك اكتسيونەرلەرى مەن ءتيىستى مەملەكەتتەر باسشىلىعى تاراپىنان ءبىر اۋىزدان مويىندالادى. بۇل كونسورتسيۋمعا ەشقاشان سانكتسيالار نەمەسە شەكتەۋ شارالارى ەنگىزىلمەگەنىنەن ايقىن كورىنەدى»، - دەپ باسا ايتتى كومپانيا.
ەسكە سالايىق 17 اقپان كۇنى كاسپي قۇبىر كونسورتسيۋمىنىڭ مۇناي تاسىمالداۋ نىسانى — «كروپوتكينسكايا» مۇناي ايداۋ ستانساسى دروندار شابۋىلىنا ۇشىراعانىن حابارلادىق.
كەيىن ۋكراينا جاسالعان شابۋىلدى رەسمي تۇردە مالىمدەگەن ەدى.
