«گلازامي يستوري» YouTube-ارناسىنىڭ اۆتورى، تاريحشى ءارى بلوگەر ايبەك ابدۋراحمانوۆقا قاتىستى قوزعالعان ۇلتارالىق ارازدىقتى قوزدىرۋ جونىندەگى قىلمىستىق ءىس توقتاتىلدى. بۇل تۋرالى ول ءوزىنىڭ الەۋمەتتىك جەلىدەگى پاراقشاسىندا مالىمدەدى، دەپ حابارلايدى "ادىرنا".
ايبەك ابدۋراحمانوۆتىڭ ايتۋىنشا، ءىس قىلمىس قۇرامىنىڭ بولماۋىنا بايلانىستى جابىلعان.
«دوستار، قىلمىستىق ءىس قىلمىس قۇرامىنىڭ بولماۋىنا بايلانىستى توقتاتىلدى. بۇل وتە قيىن كەزەڭ بولدى – دەنساۋلىقتان ايىرىلۋ، وتباسى ءۇشىن سترەسس، ادۆوكاتتارعا كەتكەن ۇلكەن شىعىندار»، – دەپ جازدى ول.
بۇعان دەيىن دە ونىڭ ادۆوكاتى بۇل اقپاراتتى راستاعان ەدى. تەرگەۋ بىرنەشە ايعا سوزىلعان.
ەسكە سالايىق، 30 شىلدەدە الماتىدا قازاقستانداعى ادام قۇقىقتارى جونىندەگى حالىقارالىق بيۋرو ۇيىمداستىرعان ءباسپاسوز كونفەرەنتسياسىندا تاريحشىعا قارسى ءىس قوزعالعانى حابارلانعان بولاتىن. ول كەزدە ارازدىق بەلگىلەرى ابدۋراحمانوۆتىڭ تاريحي جازبالارىنان ەمەس، سول جازبالارعا قالدىرىلعان پايدالانۋشىلاردىڭ كەي پىكىرلەرىنەن «انىقتالعانى» ايتىلعان.
قۇقىق قورعاۋشىلاردىڭ مالىمەتىنشە، ابدۋراحمانوۆتىڭ YouTube-ارناسىندا قازاقستاننىڭ حح عاسىرداعى تاريحى، ونىڭ ىشىندە اشارشىلىق پەن ساياسي قۋعىن-سۇرگىن تاقىرىپتارى كەڭىنەن كوتەرىلگەن.
