24 ناۋرىزدان باستاپ «ۇيالى بايلانىس ابونەنتتىك قۇرىلعىلارىن تىركەۋ قاعيدالارىن بەكىتۋ تۋرالى» زاڭعا ەنگىزىلگەن وزگەرىستەر كۇشىنە ەنەدى. وعان سايكەس قازاقستانعا شەتەلدەن ساتىپ الىنعان جانە اكەلىنگەن تەلەفوندار تەكسەرۋدەن ءوتۋى كەرەك، دەپ حابارلايدى "ادىرنا" ۇلتتىق پورتالى.
تسيفرلىق دامۋ جانە اەروعارىش ونەركاسىبى مينيسترلىگىنىڭ وكىلدەرىنىڭ ايتۋىنشا بۇل ەرەجەلەر وسى مەرزىمگە دەيىن ساتىپ الىنىپ، ەلگە كىرگىزىلگەن قۇرىلعىلارعا قولدانىلمايدى.
«بۇل نورما ەڭ الدىمەن 24 ناۋرىزدان كەيىن اكەلىنەتىن تەلەفوندارعا قاتىستى. قازىردىڭ وزىندە پايدالانىلىپ جۇرگەن قۇرىلعىلار اۆتوماتتى تۇردە "اق تىزىمگە" ەنگىزىلەدى، سەبەبى زاڭنىڭ كەرى كۇشى جوق. وزگەرىستىڭ نەگىزگى ماقساتى – تەلەفوننىڭ زاۋىتتان سوڭعى تۇتىنۋشىعا دەيىنگى جولىن اشىق ەتۋ جانە زاڭسىز تەلەفون يمپورتىنىڭ الدىن الۋ»، – دەپ مالىمدەدى تسيفرلىق دامۋ مينيسترلىگى تەلەكوممۋنيكاتسيالار كوميتەتىنىڭ وكىلى دياس تولەگەنوۆ.
قۇرىلعىلاردى تەكسەرۋ ءۇشىن ارنايى پورتالعا تىركەلىپ، قۇرىلعى تۋرالى مالىمەتتەردى ۇسىنۋ كەرەك. يمپورتتاۋشىلار دەكلاراتسيا قۇجاتتارىن، ال جەكە تۇلعالار شەكارادان وتكەن كۇنى مەن قۇرىلعى اكەلىنگەن ەل تۋرالى اقپاراتتى كورسەتۋى قاجەت.
بۇل مالىمەتتەر GSMA (جاھاندىق ءموبيلدى بايلانىس قاۋىمداستىعى) دەرەكقورىنداعى اقپاراتپەن جانە مەملەكەتتىك ورگانداردىڭ (كەدەن، سالىق، شەكارا قىزمەتى) دەرەكتەرىمەن سالىستىرىلادى.
تەلەفوندار تەكسەرۋدەن وتكەننەن كەيىن ءۇش ءتۇرلى ءتىزىمنىڭ بىرىنە ەنگىزىلەدى. "اق تىزىمگە" ەنگەن قۇرىلعىلار ەش قيىندىقسىز قولدانىلا بەرەدى. "سۇر تىزىمگە" ەنگىزىلگەن تەلەفوندار 30 كۇن ىشىندە تەكسەرىستەن ءوتۋى قاجەت. ەگەر يەسى وسى مەرزىم ىشىندە تىركەۋدى راستاماسا، بايلانىس قىزمەتتەرىن پايدالانۋ شەكتەلۋى مۇمكىن. ال "قارا تىزىمگە" ەنگەن قۇرىلعىلار – ۇرلانعان نەمەسە زاڭسىز تىركەلگەن تەلەفوندار بولىپ سانالادى. مۇنداي تەلەفوندارعا قازاقستاندا ۇيالى بايلانىس قىزمەتى كورسەتىلمەيدى.
تسيفرلىق دامۋ مينيسترلىگىنىڭ وكىلى ازامات سەرىكتاەۆ بۇل وزگەرىستەر تەلەفون باعاسىنا اسەر ەتپەيتىنىن، سەبەبى يمپورتتىق سالىقتار وزگەرمەيتىنىن ايتتى.
قازىرگى ۋاقىتتا قازاقستاندا شامامەن 3,7 ملن قايتالاناتىن IMEI-كودى بار قۇرىلعى جۇمىس ىستەيدى. بۇرىنعى تسيفرلىق دامۋ ءمينيسترى باعدات مۋسين 2023 جىلى بۇل قۇرىلعىلاردىڭ زاڭسىز اكەلىنەتىنىن جانە سونىڭ سالدارىنان بيۋدجەت جىل سايىن 100 ملرد تەڭگەدەن استام شىعىنعا ۇشىرايتىنىن مالىمدەگەن بولاتىن. الايدا جاڭا ەرەجەلەر بويىنشا، 24 ناۋرىزعا دەيىن ەلگە اكەلىنگەن مۇنداي قۇرىلعىلار اۆتوماتتى تۇردە "اق تىزىمگە" ەنگىزىلىپ، تەكسەرۋدەن وتپەيدى.
ۇيالى بايلانىس قۇرىلعىلارىن تىركەۋ قاعيدالارىنا وزگەرىستەر 13 قاڭتاردا ەنگىزىلىپ، 24 ناۋرىزدان باستاپ كۇشىنە ەنەدى.
