24 nauryzdan bastap şetelden äkelıngen telefondardy tekseru bastalady

24 nauryzdan bastap «Ūialy bailanys abonenttık qūrylǧylaryn tırkeu qaǧidalaryn bekıtu turaly» zaŋǧa engızılgen özgerıster küşıne enedı. Oǧan säikes Qazaqstanǧa şetelden satyp alynǧan jäne äkelıngen telefondar tekseruden ötuı kerek, dep habarlaidy "Adyrna" ūlttyq portaly. Sifrlyq damu jäne aeroǧaryş önerkäsıbı ministrlıgınıŋ ökılderınıŋ aituynşa būl erejeler osy merzımge deiın satyp alynyp, elge kırgızılgen qūrylǧylarǧa qoldanylmaidy. «Būl norma eŋ aldymen 24 nauryzdan keiın äkelınetın telefondarǧa qatysty. Qazırdıŋ özınde paidalanylyp jürgen qūrylǧylar avtomatty türde "aq tızımge" engızıledı, sebebı zaŋnyŋ kerı küşı joq. Özgerıstıŋ negızgı maqsaty – telefonnyŋ zauyttan soŋǧy tūtynuşyǧa deiıngı jolyn aşyq etu jäne zaŋsyz telefon importynyŋ aldyn alu», – dep mälımdedı Sifrlyq damu ministrlıgı telekommunikasiialar komitetınıŋ ökılı Dias Tölegenov. Qūrylǧylardy tekseru üşın arnaiy portalǧa tırkelıp, qūrylǧy turaly mälımetterdı ūsynu kerek. İmporttauşylar deklarasiia qūjattaryn, al jeke tūlǧalar şekaradan ötken künı men qūrylǧy äkelıngen el turaly aqparatty körsetuı qajet. Būl mälımetter GSMA (Jahandyq mobildı bailanys qauymdastyǧy) derekqoryndaǧy aqparatpen jäne memlekettık organdardyŋ (keden, salyq, şekara qyzmetı) derekterımen salystyrylady. Telefondar tekseruden ötkennen keiın üş türlı tızımnıŋ bırıne engızıledı. "Aq tızımge" engen qūrylǧylar eş qiyndyqsyz qoldanyla beredı. "Sūr tızımge" engızılgen telefondar 30 kün ışınde tekserısten ötuı qajet. Eger iesı osy merzım ışınde tırkeudı rastamasa, bailanys qyzmetterın paidalanu şekteluı mümkın. Al "qara tızımge" engen qūrylǧylar – ūrlanǧan nemese zaŋsyz tırkelgen telefondar bolyp sanalady. Mūndai telefondarǧa Qazaqstanda ūialy bailanys qyzmetı körsetılmeidı. Sifrlyq damu ministrlıgınıŋ ökılı Azamat Serıktaev būl özgerıster telefon baǧasyna äser etpeitının, sebebı importtyq salyqtar özgermeitının aitty. Qazırgı uaqytta Qazaqstanda şamamen 3,7 mln qaitalanatyn IMEI-kody bar qūrylǧy jūmys ısteidı. Būrynǧy sifrlyq damu ministrı Baǧdat Musin 2023 jyly būl qūrylǧylardyŋ zaŋsyz äkelınetının jäne sonyŋ saldarynan biudjet jyl saiyn 100 mlrd teŋgeden astam şyǧynǧa ūşyraitynyn mälımdegen bolatyn. Alaida jaŋa erejeler boiynşa, 24 nauryzǧa deiın elge äkelıngen mūndai qūrylǧylar avtomatty türde "aq tızımge" engızılıp, tekseruden ötpeidı. Ūialy bailanys qūrylǧylaryn tırkeu qaǧidalaryna özgerıster 13 qaŋtarda engızılıp, 24 nauryzdan bastap küşıne enedı.