ءماجىلىس دەپۋتاتى رينات زايتوۆ قازاقستاندا كۇننەن-كۇنگە ءورشىپ بارا جاتقان ونلاين الاياقتىق ماسەلەسىن كوتەرىپ، قارجى نارىعىن رەتتەۋ جانە دامىتۋ اگەنتتىگىنىڭ توراعاسىنا دەپۋتاتتىق ساۋال جولدادى. ول كيبەرالاياقتاردىڭ ارەكەتتەرى حالىققا ۇلكەن زيان تيگىزىپ جاتقانىن جانە بۇل قىلمىستارعا بانكتەردىڭ دە جاۋاپكەرشىلىگى بولۋى كەرەك ەكەنىن باسا ايتتى.
زايتوۆتىڭ ايتۋىنشا، الاياقتار تەك ازاماتتاردىڭ شوتتارىنان اقشا ۇرلاپ قانا قويماي، ولاردىڭ اتىنا سىرتتاي نەسيە راسىمدەپ، حالىقتى تىعىرىققا تىرەپ وتىر. دەپۋتات مەملەكەتتىك ورگانداردىڭ دا بۇل ماسەلەگە نەمقۇرايلى قارايتىنىن سىنادى.
"وكىنىشكە قاراي، جازىقسىز جەم بولعان جانداردىڭ جاعدايىن ۇعىپ جاتقان ۇكىمەت تە، بانكتەر دە كورىنبەيدى. كوپتەگەن الاياقتىق فاكتىلەرىندە بانك نەمەسە جەرگىلىكتى ورگان وكىلدەرىنىڭ قاتىسى بار ەكەنى دالەلدەنگەن", – دەدى زايتوۆ.
دەپۋتات كەلتىرگەن مالىمەتكە سايكەس، قاراعاندى قالاسىنىڭ جۇمىسپەن قامتۋ جانە الەۋمەتتىك قورعاۋ باسقارماسىنىڭ قىزمەتكەرى مۇگەدەكتىگى بار جانە زەينەتتەگى 90 ادامنىڭ شوتىنداعى اقشانى جىمقىرعان. سونداي-اق، تالدىقورعان، استانا، الماتى قالالارىندا بانك قىزمەتكەرلەرى ازاماتتاردىڭ جەكە مالىمەتتەرىنە قول جەتكىزۋگە كومەكتەسكەنى انىقتالعان.
2025 جىلدىڭ قاڭتار-اقپان ايلارىنىڭ وزىندە قر قك 250-بابى ("وكىلەتتىكتەردى تەرىس پايدالانۋ") بويىنشا – 15 ءىس جانە قر قك 254-بابى ("مىندەتتەرىنە ادال قاراماۋ") بويىنشا – 17 ءىس قوزعالعان.
رينات زايتوۆ بانكتەردىڭ كيبەرقىلمىستان قورعاۋعا مىندەتتى ەكەنىن، الايدا ەشقانداي جاۋاپكەرشىلىك كوتەرمەيتىنىن سىنعا الدى. ونىڭ ايتۋىنشا، الاياقتار ۇرلاعان اقشانىڭ ورنىن تولتىرۋ بانكتىڭ مىندەتى بولۋى ءتيىس.
ء"سال قينالسا، مەملەكەتتەن ميللياردتاپ قارجىنى قايتارىمسىز الاتىن، ءوز قاتەلىكتەرىنە جاۋاپ بەرۋدەن جالتاراتىن قايىرىمسىز بانكتەر قاشانعا دەيىن تايرانداماق؟ ناقاقتان-ناقاق قارىزعا باتقان حالىقتى قورعايتىن ۋاقىت كەلدى!" – دەپ اشىندى دەپۋتات.
رينات زايتوۆ وسى سالاعا ەكى ناقتى تالاپ قويدى.
ءبىرىنشى تالاپ: ەكىنشى دەڭگەيلى بانكتەر الاياقتاردان زارداپ شەككەن ازاماتتاردىڭ شوتتارىن بۇعاتتان شىعارۋى كەرەك. سونىمەن قاتار، مۇنداي ساناتتاعى ادامداردىڭ شوتتارىن بۇعاتتاۋعا زاڭمەن تىيىم سالۋ قاجەت.
ەكىنشى تالاپ: كيبەرالاياقتار ۇرلاعان اقشانىڭ شىعىنىن بانك وتەۋگە مىندەتتى بولۋى ءتيىس، ويتكەنى بانكتەر كليەنتتەردىڭ قارجىسىن ساقتاۋعا تىكەلەي جاۋاپتى.
بۇل ماسەلە قوعامدا ۇلكەن رەزونانس تۋدىرىپ وتىر. ەندى ۇكىمەت پەن قارجى سەكتورىنداعى جاۋاپتى ورگاندار قانداي شەشىم قابىلدايتىنى بەلگىسىز.
