Májilis depýtaty Rınat Zaıtov Qazaqstanda kúnnen-kúnge órship bara jatqan onlaın alaıaqtyq máselesin kóterip, Qarjy naryǵyn retteý jáne damytý agenttiginiń tóraǵasyna depýtattyq saýal joldady. Ol kıberalaıaqtardyń áreketteri halyqqa úlken zııan tıgizip jatqanyn jáne bul qylmystarǵa bankterdiń de jaýapkershiligi bolýy kerek ekenin basa aıtty.
Zaıtovtyń aıtýynsha, alaıaqtar tek azamattardyń shottarynan aqsha urlap qana qoımaı, olardyń atyna syrttaı nesıe rásimdep, halyqty tyǵyryqqa tirep otyr. Depýtat memlekettik organdardyń da bul máselege nemquraıly qaraıtynyn synady.
"Ókinishke qaraı, jazyqsyz jem bolǵan jandardyń jaǵdaıyn uǵyp jatqan Úkimet te, bankter de kórinbeıdi. Kóptegen alaıaqtyq faktilerinde bank nemese jergilikti organ ókilderiniń qatysy bar ekeni dáleldengen", – dedi Zaıtov.
Depýtat keltirgen málimetke sáıkes, Qaraǵandy qalasynyń Jumyspen qamtý jáne áleýmettik qorǵaý basqarmasynyń qyzmetkeri múgedektigi bar jáne zeınettegi 90 adamnyń shotyndaǵy aqshany jymqyrǵan. Sondaı-aq, Taldyqorǵan, Astana, Almaty qalalarynda bank qyzmetkerleri azamattardyń jeke málimetterine qol jetkizýge kómekteskeni anyqtalǵan.
2025 jyldyń qańtar-aqpan aılarynyń ózinde QR QK 250-baby ("Ókilettikterdi teris paıdalaný") boıynsha – 15 is jáne QR QK 254-baby ("Mindetterine adal qaramaý") boıynsha – 17 is qozǵalǵan.
Rınat Zaıtov bankterdiń kıberqylmystan qorǵaýǵa mindetti ekenin, alaıda eshqandaı jaýapkershilik kótermeıtinin synǵa aldy. Onyń aıtýynsha, alaıaqtar urlaǵan aqshanyń ornyn toltyrý banktiń mindeti bolýy tıis.
"Sál qınalsa, memleketten mıllıardtap qarjyny qaıtarymsyz alatyn, óz qatelikterine jaýap berýden jaltaratyn qaıyrymsyz bankter qashanǵa deıin taırandamaq? Naqaqtan-naqaq qaryzǵa batqan halyqty qorǵaıtyn ýaqyt keldi!" – dep ashyndy depýtat.
Rınat Zaıtov osy salaǵa eki naqty talap qoıdy.
Birinshi talap: Ekinshi deńgeıli bankter alaıaqtardan zardap shekken azamattardyń shottaryn buǵattan shyǵarýy kerek. Sonymen qatar, mundaı sanattaǵy adamdardyń shottaryn buǵattaýǵa zańmen tyıym salý qajet.
Ekinshi talap: Kıberalaıaqtar urlaǵan aqshanyń shyǵynyn bank óteýge mindetti bolýy tıis, óıtkeni bankter klıentterdiń qarjysyn saqtaýǵa tikeleı jaýapty.
Bul másele qoǵamda úlken rezonans týdyryp otyr. Endi Úkimet pen qarjy sektoryndaǵy jaýapty organdar qandaı sheshim qabyldaıtyny belgisiz.
