«ادىرنا» قوعامدىق بىرلەستىگى باس بولىپ «ءدۇلدۇل ءان مەن پىراق كۇي» كونتسەرتىن وتكىزدى. قازاق مۋزىكاسىنىڭ جاۋھارى – ءداستۇرلى اندەرى مەن قۇدىرەتتى كۇيلەرى عابيت مۇسىرەپوۆ اتىنداعى بالالار مەن جاسوسپىرىمدەر تەاترىندا كۇمبىرلەپ، كوپشىلىكتىڭ قۇلاق قۇرىشىن قاندىردى.
ءتول مۇرامىزدىڭ جوقتاۋشىسى دا، ناسيحاتتاۋشىسى دا بولىپ جۇرگەن ءداستۇرلى انشىلەر ساحنانى ساعىنىپ قالسا كەرەك، كەشەگى وتكەن سال-سەرىلەردىڭ جىلقى جۇيرىككە ارناپ شىعارعان تۋىندىلارىن شىرقادى. كەشتى ەربول ءبىلالوۆ جامبىلدىڭ «شاشۋىمەن» اشىپ بەردى. جولامان قۇجيمانوۆ اقان سەرىنىڭ «كوك الا تاي» ءانىن تامىلجىتا ورىنداعاندا كورەرمەن ارعىماققا مىنگەندەي ارقالانىپ كەتسە، حالىق ءانى «ەكى جيرەندى» شىرقاپ، تىڭدارماندى سەرپىلتتى. اقاننىڭ «تورىنى تاڭ اسىرىپ مىنگەن قانداي» ءانىن ويناقتاتا ورىنداعان باقتيار اقىنجانوۆ تىڭداۋشىنىڭ قيالىن جاستىق شاعىنا جەتەلەدى. ءبىرجان سالدىڭ كوپ ناسيحاتتالماي، ارحيۆتە شاڭ جۇتىپ جاتقان «كەر كەكىل» ءانىن جاس ءانشى جاسۇلان ساقاەۆ، «بۋىرىل تايىن» سايات نۇرعازين كوپتىڭ الدىندا شىرقادى.، ەستايدىڭ «جايقوڭىر» دەگەن ءانى بار. «اۋەلى بۇل شىركىندى باستاۋ قيىن، ەكىنشى جۇرتتىڭ ءسوزىن تاستاۋ قيىن» دەپ باستالاتىن ءاننىڭ ەكىنشى نۇسكاسىن تىرىلتكەن جان – دانەش راقىشەۆ. كەشتە ەستاي شىعارعان «جايقوڭىردىڭ» بىزگە راقىشەۆ ارقىلى جەتكەن نۇسقاسىن تالعات ابۋعازى اۋەلەتتى. شورماننىڭ مۇستافاسى اتىن تارتىپ الىپ، زورلىق-زومبىلىقپەن جاياۋ ءجۇرىپ كۇرەسكەن جاياۋ مۇسانىڭ «حاۋلاۋىن» ابزال قۋانىشەۆ، حالىق اندەرى «سۇرجەكەيدى» ەركىن نۇرحانوۆ، «بوزجورعانى» ەلزا قارابالينا تامىلجىتا اۋەلەتىپ، وتكەن كۇندى ەسكە ءتۇسىردى. پاتشا وكىمەتىنە قارسى شىعىپ، باي-بولىستارمەن جاعالاسام دەپ اباقتىعا قامالىپ، ءومىر بويى قۋعىن-ءسۇرىن كورگەن ءيمانجۇسىپتىڭ «سارمويىن» ءانىن وزگەرىس شەرتبايۇلى، دانەش راقىشەۆتىڭ «سۇلۋ جيرەنىن» تالانتتى ءانشى تىلەۋلەس قۇرمانعاليەۆ ناقىشىنا كەلتىرە ورىندادى. كەشتىڭ جۇرگىزگەن ءانشى ەرلان تولەۋتاي دا ەل الدىنا شىعىپ، اقان سەرىنىڭ «ماڭماڭكەرىن» شىرقاپ، كوپشىلىكتى ءبىر سەرپىلتتى. ساكەن سەيفۋلليننىڭ «تاۋ ىشىندە» ءانىن جاقسىگەلدى ماياساروۆ بەرىلە ورىنداعاندا زالداعىلار قۇرمەت-قوشەمەتىن ايامادى. تۇرسىنعازى راحىموۆتىڭ «ەركە جيرەنىن» جاسۇلان قوڭىروۆ، اقان سەرىنىڭ «قۇلاگەرىن» ەركىن شۇكىمانوۆ، حالىق ءانى «قوس قوڭىردى» رامازان ستامعازيەۆ ورىندادى.
كۇيشى ايگۇل ۇلكەنباەۆا قۇرمانعازىنىڭ «كوك الا ات» كۇيىن كۇمبىرلەتسە، تاتتىمبەتتىڭ «بوزايعىرىن» سىرىم نۇرمولدين شەرتتى. تۇركى حالىقتارىنا ورتاق «كوروعلى» داستانىنداعى تۇلپاردىڭ شابىسى باياندالاتىن ءۇزىندىسىن جىرشى ۇلجان بايبوسىنوۆا ايتىپ بەردى. سىبىزعىشى تالعات مۇقىشەۆتىڭ سىزىلتا توككەن كۇيى قانداي تاماشا!
انشەيىندە شەتەلدەن انشىلەر كەلىپ، كونتسەرتىن وتكىزەم دەسە، باس قولداۋشى بولىپ جۇرەتىن الماتى قالاسىنىڭ اكىمدىگى دە «ءدۇلدۇل ءان مەن پىراق كۇي» كونتسەرتىنە دەمەۋشىلىك تانىتقان جوق. قاعىنان جەرىگەن قۇلان سەكىلدى ءوزىنىڭ ساف ونەرىنەن بەزىنگەن قوعامنىڭ قاتىگەزدىگى قايدا اپارىپ سوعار ەكەن…
ەكى ساعاتتان اسا ۋاقىتقا سوزىلعان تاماشا كەشتى ۇيىمداستىرۋ ءۇشىن «ادىرنا» قوعامدىق بىرلەستىگىنىڭ توراعاسى ارمان اۋباكىر باستاعان جىگىتتەر قولداۋشى تاپپاي تالايدىڭ ەسىگىنەن قايتقان. تاسىر-تۇسىر، سالدىر-گۇلدىر داڭعازا مۋزىكا دەندەي بويلاپ العان قازىرگى قوعام ءۇشىن ءداستۇرلى اندەردىڭ قادىرى بولماي تۇرعانى اقيقات. سونى جەلەۋ ەتىپ باي-ماناپتار «دومبىرامەن وتەتىن كەش پە؟» دەگەن سىڭايدا دەمەۋشىلىك جاساۋدان سىرت اينالعان كورىنەدى. تەك «ZHERSU» ينۆەستيتسيالىق-وندىرىستىك كورپوراتسياسىنىڭ باسقارما توراعاسى باۋىرجان وسپانوۆ، وتەمىس ماحانۇلى، جاسان زەكەيۇلى سىندى كاسىپكەرلەر عانا اتىمتاي-جومارتتىق تانىتىپتى.
قوعامدىق بىرلەستىك ءتورت-بەس جىلدىڭ بەدەرىندە ءداستۇرلى انشىلەردىڭ قاتىسۋىمەن 7 كەش ۇيىمداستىرىپتى. ءبارىن اقشا بايلاپ-ماتاپ قويعان ءومىر مايدانىندا ەڭسەسىن تىك ۇستاپ، قازاق مادەنيەتىنە تولايىم ۇلەس قوسىپ كەلە جاتقان ادىرنالىقتارعا جينالعان كوپشىلىك العىسىن جاۋدىردى. ەندى ولار بالۋان شولاقتىڭ تۋعانىنا 150 جىل تولۋىنا بايلانىستى كونتسەرت وتكىزبەك. ولاردىڭ الدىنان شىعاتىن ەڭ ۇلكەن كەدەرگى – قولدىڭ قىسقالىعى. مادەنيەت ءمينيسترى ارىستانبەك مۇحامەديۇلى بىرلەستىكتىڭ بىرەگەي جوباسىن قاناتىنىڭ استىنا السا، ۇلكەن ساۋاپ بولار ەدى.
ق.راحمەت،
الماتى قالاسى،
«جاس الاش».
