الياسكا بيلىگى 6 اقپاندا شتاتتىڭ باتىسىندا اپاتقا ۇشىراعان ۇشاقتىڭ قالدىقتارىن بەرينگ تەڭىزىنىڭ مۇزىنان شىعارۋمەن اينالىسىپ جاتىر. اپات سالدارىنان بورتتاعى 10 ادامنىڭ ءبارى قازا تاپتى، دەپ حابارلايدى "ادىرنا" ۇلتتىق پورتالى "امەريكا داۋسىنا" سىلتەمە جاساپ.
Bering Air اۋە كومپانياسىنا تيەسىلى ءبىر موتورلى ۇشاق بەيسەنبى كۇنى كۇندىز ۋنالاكليتتەن نوم قالاسىنا باعىت العان كەزدە جوعالىپ كەتكەن. ۇشاق ۇزاق ىزدەۋ جۇمىستارىنان كەيىن كەلەسى كۇنى تابىلدى. بورتتا بولعان 9 جولاۋشى مەن ۇشقىش قايتىس بولدى.
جەرگىلىكتى، مەملەكەتتىك جانە فەدەرالدىق اگەنتتىكتەر كەڭ كولەمدى ىزدەستىرۋ وپەراتسياسىن جۇرگىزدى. ولار مۇز باسقان تەڭىز بەن تۋندرانىڭ جۇزدەگەن شاقىرىمىن تەكسەرىپ، ۇشاقتىڭ ورنىن انىقتادى. سەنبى كۇنى قۇتقارۋشىلار قالدىقتاردى جانە قازا بولعانداردىڭ دەنەلەرىن شىعارا باستاعانىمەن، كۇشتى جەل مەن قارلى بوران جۇمىستى توقتاتۋعا ماجبۇرلەدى.
ۇلتتىق كولىك قاۋىپسىزدىگى كەڭەسى اپاتتىڭ سەبەبىن انىقتاۋ ءۇشىن ءارتۇرلى شتاتتاردان ساراپشىلار جىبەردى. اقش ازاماتتىق اۆياتسيا ءپاترۋلىنىڭ رادار دەرەكتەرى ۇشاقتىڭ كەنەتتەن بيىكتىگى مەن جىلدامدىعىن جوعالتقانىن كورسەتتى، الايدا اپاتتىڭ ناقتى سەبەبى ءالى بەلگىسىز.
اقش جاعالاۋ كۇزەتىنىڭ كاپيتان-لەيتەنانتى بەندجامين ماكينتاير-كوبل ۇشاقتىڭ اپاتتىق دابىل بەلگىسىن جىبەرمەگەنىن ايتتى. ەگەر ۇشاق سۋعا قۇلاسا، اۆاريالىق تاراتقىش سپۋتنيككە بەلگى جىبەرىپ، ول اقپارات جاعالاۋ كۇزەتىنە بەرىلۋى كەرەك ەدى. بىراق مۇنداي سيگنال تىركەلمەگەن.
الياسكانىڭ كەڭ اۋماعى مەن ينفراقۇرىلىمىنىڭ شەكتەۋلىگىنە بايلانىستى جەرگىلىكتى تۇرعىندار ءۇشىن ۇشاقپەن قاتىناۋ – ۇيرەنشىكتى نارسە. شتاتتىڭ كوپتەگەن ەلدى مەكەندەرى جول جەلىسىمەن بايلانىسپاعان، سوندىقتان ادامدار نەگىزىنەن ۇشاقپەن قاتىنايدى.
