قازاقستاندا سۋ شارۋاشىلىعى سالاسىنا قاجەتتى كادرلاردى دايارلايتىن وقۋ ورىندارىنىڭ سانى كوبەيدى، دەپ حابارلايدى "ادىرنا" ۇلتتىق پورتالى.
سۋ رەسۋرستارى جانە يرريگاتسيا مينيسترلىگىنىڭ مالىمەتىنشە، سوڭعى جىلدارى سالاداعى كادرلىق الەۋەتتى ارتتىرۋ بويىنشا جۇيەلى جۇمىس جۇرگىزىلىپ كەلەدى.
2023 جىلى ەلىمىزدە سۋ شارۋاشىلىعى ماماندارىن دايارلايتىن 9 جوعارى وقۋ ورنى مەن 6 كوللەدج جۇمىس ىستەگەن. قازىر ولاردىڭ سانى 13 ۋنيۆەرسيتەت پەن 10 ارناۋلى ورتا وقۋ ورنىنا دەيىن ءوستى. وسىلايشا، سۋ سالاسىنا مامان دايارلايتىن وقۋ ورىندارىنىڭ جالپى سانى 15-تەن 23-كە دەيىن ارتقان.
مەملەكەت باسشىسىنىڭ تاپسىرماسىنا سايكەس تاراز قالاسىندا قازاق ۇلتتىق سۋ شارۋاشىلىعى جانە يرريگاتسيا ۋنيۆەرسيتەتى قۇرىلدى.
سونىمەن قاتار استانا تەحنولوگيالىق كوللەدجى، كوكسۋ پوليتەحنيكالىق كوللەدجى، تەمىرتاۋ جوعارى پوليتەحنيكالىق كوللەدجى جانە ماڭعىستاۋ يندۋستريالىق-تەحنيكالىق كوللەدجىندە ستۋدەنتتەرگە سۋ شارۋاشىلىعى سالاسىنا قاتىستى ماماندىقتار بويىنشا ءبىلىم الۋ مۇمكىندىگى بەرىلدى.
سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆتىڭ ايتۋىنشا، مينيسترلىك سۋ شارۋاشىلىعى ماماندارىن دايارلايتىن بارلىق وقۋ ورنىمەن مەموراندۋم جاساعان.
«بۇل وقۋ ورىندارىندا ءبىلىم الاتىن ستۋدەنتتەر «قازسۋشار» رمك فيليالدارىندا وندىرىستىك تاجىريبەدەن وتەدى. بيىل سۋ شارۋاشىلىعى سالاسىندا وندىرىستىك تاجىريبەدەن وتكەن ستۋدەنتتەردىڭ سانى بىلتىرمەن سالىستىرعاندا ەكى ەسەگە جۋىق ارتتى. قازىرگى تاڭدا سۋ سالاسى بويىنشا ماماندىقتاردا شامامەن 2,7 مىڭ ادام ءبىلىم الىپ جاتىر»، – دەدى مينيستر.
