ازەربايجاننىڭ باس پروكۋراتۋراسى كونستيتۋتسيالىق قۇرىلىستى كۇشپەن وزگەرتۋگە، اۋماقتىق تۇتاستىعىن بۇزۋعا، ۇلتتىق ارازدىقتى قوزدىرۋعا جانە تەرروريزمگە شاقىرۋ بويىنشا قىلمىستىق ءىستى تەرگەپ جاتىر، دەپ حابارلايدى "ادىرنا" ءتىلشىسى.
Report دەرەگىنشە، باس پروكۋراتۋرادا تەرگەۋ بارىسىندا رەسەي ازاماتتارى – «موسكۆا 24» تەلەارناسىنىڭ جۇرگىزۋشىسى ءارى جۋرناليست يۆان كنيازەۆ، رەسەيدە ساياسي كەڭەسشى جانە مەديا ساراپشى رەتىندە تانىلاتىن سەميون ۋرالوۆ جانە رەسەي كولىك ءمينيسترىنىڭ كەڭەسشىسى، تەلەجۋرناليست الەكسەي چاداەۆقا قاتىستى كۇدىك پايدا بولعان. پروكۋراتۋرا دەرەگىنە سايكەس، اتالعان ازاماتتار 2026 جىلعى 14 شىلدەدە سەميون ۋرالوۆتىڭ YouTube ارناسىندا جاريالانعان «چيستوتا پونيمانيا» باعدارلاماسىندا ازەربايجانعا قاتىستى كۇش قولدانۋعا، ەلدىڭ كونستيتۋتسيالىق قۇرىلىسىن كۇشپەن وزگەرتۋگە جانە اۋماقتىق تۇتاستىعىن بۇزۋعا شاقىرعان. سونداي-اق ولاردىڭ سوزدەرىندە ۇلتتىق وشپەندىلىك پەن ارازدىقتى قوزدىرۋ بەلگىلەرى بولعان.
بۇدان بولەك، پروكۋراتۋرا 13 تامىزدا وسى YouTube ارناسىندا جاريالانعان باعدارلامادا اتالعان تۇلعالار ازەربايجانعا قارسى كۇش قولدانۋ تۋرالى پىكىر ءبىلدىرىپ، كەيبىر ادامداردى فيزيكالىق تۇردە جويۋ قاۋپىمەن ۇستاۋ جانە ولاردى نىساناعا الىپ جويۋ جونىندە ءسوز قوزعاعانىن حابارلادى. وسىعان بايلانىستى ولار تەرروريزمگە جاريا تۇردە شاقىردى دەگەن كۇدىككە ىلىنگەن.
وسى فاكتىلەر بويىنشا ازەربايجاننىڭ باس پروكۋرورى قىلمىستىق كودەكستىڭ 214-2-بابى (تەرروريزمگە جاريا تۇردە شاقىرۋ), 281.2-بابى (مەملەكەتكە قارسى باعىتتالعان جاريا ۇندەۋلەر) جانە 283.2.1-بابى (ۇلتتىق وشپەندىلىك پەن ارازدىقتى قوزدىرۋ) بويىنشا قىلمىستىق ءىس قوزعاعان.
الدىن الا تەرگەۋ باس پروكۋراتۋرانىڭ تەرگەۋ باسقارماسىنا تاپسىرىلعان. جينالعان دالەلدەر نەگىزىندە سەميون ۋرالوۆ، يۆان كنيازەۆ جانە الەكسەي چاداەۆ اتالعان باپتار بويىنشا ايىپتالۋشى رەتىندە تانىلعان. ولار ازەربايجان اۋماعىنان تىس جەردە بولعاندىقتان، حالىقارالىق ىزدەۋگە جاريالانعان. سوت شەشىمدەرىمەن ۇشەۋىنە دە قاماۋعا الۋ تۇرىندەگى بۇلتارتپاۋ شاراسى تاڭدالعان. باس پروكۋراتۋرا ايىپتالۋشىلاردىڭ جۇرگەن جەرىن انىقتاۋ، ولاردى ۇستاۋ جانە ازەربايجانعا بەرۋ ماقساتىندا سەرىكتەس مەملەكەتتەردىڭ قۇزىرلى ورگاندارىنا ءتيىستى وتىنىشتەر جولدانعانىن حابارلادى.
سونىمەن قاتار ولاردى ينتەرپول ارنالارى ارقىلى حالىقارالىق ىزدەۋگە جاريالاۋ بويىنشا قاجەتتى شارالار قابىلدانىپ جاتىر
