رەسەي پرەزيدەنتىنىڭ ءباسپاسوز حاتشىسى دميتري پەسكوۆ ۆلاديمير پۋتين مەن اقش پرەزيدەنتى دونالد ترامپتىڭ تەلەفون ارقىلى سويلەسكەنى تۋرالى اقپاراتقا قاتىستى ناقتى جاۋاپ بەرمەدى، دەپ حابارلايدى "ادىرنا" ۇلتتىق پورتالى ينتەرفاكس-كە سىلتەمە جاساپ.
"ۆاشينگتونداعى اكىمشىلىك ءوز جۇمىسىن باستاعالى ءتۇرلى بايلانىستار ورناپ جاتىر. بۇل بايلانىستار ءارتۇرلى ارنالار ارقىلى جۇزەگە اسادى. سوندىقتان وسى بايلانىستاردىڭ كوپتىگىن ەسكەرسەك، مەن جەكە ءوزىم كەيبىر جايتتاردان حابارسىز بولۋىم مۇمكىن. سول سەبەپتى بۇل اقپاراتتى نە راستاۋ، نە جوققا شىعارۋ مەن ءۇشىن قيىن", – دەدى ول.
بۇعان دەيىن The New York Post گازەتى ترامپتىڭ رەسەي باسشىسىمەن ۋكرايناداعى قاقتىعىستى رەتتەۋ ماسەلەسى بويىنشا تەلەفون ارقىلى سويلەسكەنىن حابارلاعان ەدى.
بۇل اڭگىمەنىڭ قاشان بولعانى بەلگىسىز. ەكى پرەزيدەنتتىڭ نەشە رەت تەلەفون ارقىلى سويلەسكەنى تۋرالى سۇراققا ترامپ: «مەن بۇل تۋرالى ۇندەمەي-اق قويايىن»، – دەپ جاۋاپ بەرگەن.
ترامپتىڭ ايتۋىنشا، پۋتين ادامداردىڭ قازا تابۋىن توقتاتقىسى كەلەدى. سونداي-اق، اقش پرەزيدەنتى سوعىستى اياقتاۋدىڭ ناقتى جوسپارى بار ەكەنىن مالىمدەدى.
كەلەسى اپتادا وتەتىن ميۋنحەندەگى قاۋىپسىزدىك كونفەرەنتسياسىندا اقش ۆيتسە-پرەزيدەنتى دجەي دي ۆانس ۋكراينا پرەزيدەنتى ۆلاديمير زەلەنسكيمەن كەزدەسەدى.
سونىمەن قاتار، ترامپ اقش-تىڭ ۋكراينالىق سيرەك كەزدەسەتىن مەتالدار مەن گازعا قول جەتكىزۋى ءۇشىن زەلەنسكيمەن 500 ميلليون دوللارلىق كەلىسىم جاساسقىسى كەلەتىنىن ايتتى. بۇل كەلىسىم ۋكرايناعا قاۋىپسىزدىك كەپىلدىكتەرىن بەرۋ شارتىمەن جاسالۋى مۇمكىن.
