اقش ۋكرايناعا اسكەري كومەك كورسەتۋدى توقتاتادى. بۇل تۋرالى دۇيسەنبى كەشكە اقش پرەزيدەنتى اكىمشىلىگىنىڭ جوعارى لاۋازىمدى قىزمەتكەرى اق ۇيدە «گولوس امەريكي» راديوسىنىڭ تىلشىسىنە ايتتى، دەپ حابارلايدى “ادىرنا” ۇلتتىق پورتالى.
«پرەزيدەنت بەيبىتشىلىككە باسا نازار اۋداراتىنىن انىق ايتتى. ارىپتەستەرىمىز دە وسى ماقساتقا ۇمتىلۋى كەرەك. ءبىز كومەكتى توقتاتىپ، ونىڭ شەشىمگە ىقپال ەتەتىنىنە كوز جەتكىزۋ ءۇشىن ونى قايتا قاراۋدامىز»، - دەدى اقش پرەزيدەنتى اكىمشىلىگىنىڭ قىزمەتكەرى.
اقش پرەزيدەنتى دونالد ترامپ ءوز مىندەتىنە كىرىسكەننەن كەيىن ۋكراينا مەن رەسەيگە قاتىستى اقش ساياساتىن تۇبەگەيلى وزگەرتىپ، ماسكەۋگە ىمىراشىلدىق تانىتۋدا. اسكەري كومەك كورسەتۋ ۋاقىتشا توقتاتۋ تۋرالى شەشىم ۋكراينا پرەزيدەنتى ۆلاديمير زەلەنسكيمەن اق ۇيدەگى جۇما كۇنگى اڭگىمەدەن كەيىن قابىلداندى. كەزدەسۋدە بارىسىندا ترامپ ۋكراينا باسشىسىن رەسەيمەن سوعىستا ۆاشينگتوننىڭ قولداۋىنا جەتكىلىكتى العىس بىلدىرمەۋى ءۇشىن سىنعا العان بولاتىن.
دۇيسەنبى كۇنى دونالد ترامپ قايتادان زەلەنسكيگە امەريكالىق كومەككە ۇلكەن العىس ءبىلدىرۋى كەرەك دەپ مالىمدەدى جانە Associated Press باسىلىمىندا ۋكراينا پرەزيدەنتىنىڭ «سوعىستىڭ اياقتالۋى وتە-وتە الىس» دەگەن ءسوزى تۋرالى جاريالانعان ماقالاسىنا تەرىس رەاكتسيا ءبىلدىردى.
«بۇل زەلەنسكيدىڭ ايتقان ەڭ جامان مالىمدەمەسى جانە امەريكا بۇنى ەندى كوتەرمەيدى!» — دەپ جازدى ترامپ ءوزىنىڭ Truth Social پلاتفورماسىندا.
الايدا، سول كۇنى ترامپ امەريكالىق ينۆەستيتسيالار ءۇشىن ۋكراينالىق مينەرالدارعا قولجەتىمدىلىك اشاتىن كەلىسىمنىڭ ءالى دە جاسالۋى مۇمكىن ەكەنىن مەڭزەدى.
ترامپ اكىمشىلىگى بۇل كەلىسىمدى اقش-تىڭ ۋكرايناعا رەسەيدىڭ شابۋىلى باستالعاننان بەرى قارجىلىق جانە اسكەري كومەك رەتىندە بەرگەن قاراجاتتارىن قايتارۋدىڭ ءتاسىلى رەتىندە ۇسىنادى.
دۇيسەنبى كۇنى ترامپقا اق ۇيدە “كەلىسىم جاساۋ مۇمكىندىگى اياقتالدى ما” دەگەن سۇراققا، ول: «جوق، ولاي ويلامايمىن» دەپ جاۋاپ بەرگەن ەدى.
پرەزيدەنت وسى ماسەلە بويىنشا جاڭارتىلعان اقپاراتتى سەيسەنبى كۇنى كەشكە ەكى پالاتانىڭ كونگرەسىنە جاساعان سوزىندە بەرۋگە ۋادە ەتتى.
