سولتۇستىك كورەيا پرەزيدەنتى كيم چەن ىن ۋكرايناداعى سوعىسقا قاتىستى پىكىر ءبىلدىردى. ول رەسەيدىڭ ۋكرايناداعى سوعىسىن ەگەمەندىگىن قورعاۋ دەپ اتادى، دەپ حابارلايدى "ادىرنا" ۇلتتىق پورتالى ريا نوۆوستي-گە سىلتەمە جاساپ.
ول اقش پەن باتىس ەلدەرىن قاقتىعىستى سوزىپ، رەسەيدى ستراتەگيالىق جەڭىلىسكە ۇشىراتۋعا تىرىسىپ جاتىر دەپ ايىپتادى.
كيم چەن ىن پحەنياننىڭ رەسەيدى تۇراقتى تۇردە قولدايتىنىن مالىمدەپ، بۇل ۇستانىم ەكى ەل اراسىنداعى "جان-جاقتى ستراتەگيالىق ارىپتەستىك تۋرالى كەلىسىمگە" سايكەس كەلەتىنىن اتاپ ءوتتى. سولتۇستىك كورەيا باسشىسى رەسەي حالقىنىڭ ەگەمەندىگىن، قاۋىپسىزدىگىن جانە اۋماقتىق تۇتاستىعىن قورعاۋ ءىسىن ءادىل كۇرەس دەپ باعالادى.
سونىمەن قاتار، ول سولتۇستىك كورەيانىڭ بارلىق تەجەۋ كۇشتەرىن، سونىڭ ىشىندە يادرولىق قارۋلاردى كۇشەيتۋ جوسپارىن جاريالادى. كيم چەن ىننىڭ ايتۋىنشا، اقش، جاپونيا جانە وڭتۇستىك كورەيانىڭ اسكەري وداعى، سونداي-اق كورەي تۇبەگىندە ورنالاستىرىلعان اقش-تىڭ يادرولىق ستراتەگيالىق كۇشتەرى ايماقتاعى تەپە-تەڭدىكتى بۇزادى.
ايتا كەتەيىك، كحدر مەن رەسەي 2024 جىلدىڭ ماۋسىم ايىندا جان-جاقتى ستراتەگيالىق ارىپتەستىك تۋرالى كەلىسىمگە قول قويعان بولاتىن.
