رەسەي باكۋدەگى «ورىس ءۇيى» وكىلدىگىن جابۋ تۋرالى ازەربايجان بيلىگىنىڭ شەشىمىنە وكىنەتىنىن جانە ماسەلە ەكىجاقتى كەلىسسوزدەر ارقىلى شەشىلەدى دەپ ۇمىتتەنەتىنىن مالىمدەدى، دەپ حابارلايدى "ادىرنا" ۇلتتىق پورتالى.
بۇل تۋرالى رەسەي پرەزيدەنتىنىڭ ءباسپاسوز حاتشىسى دميتري پەسكوۆ حابارلادى.
«ءبىز بۇل جاعدايعا وكىنەمىز جانە ونى تۇسىنبەستىك دەپ سانايمىز. بۇل ماسەلە ەكى ەل اراسىنداعى ءداستۇرلى دوستىق قاتىناستار اياسىندا شەشىمىن تابادى دەپ سەنەمىز»، – دەدى پەسكوۆ.
ونىڭ ايتۋىنشا، رەسەي «ورىس ءۇيىنىڭ» جۇمىسى تۋرالى ماسەلەنى جوعارى دەڭگەيدە، مەملەكەت باسشىلارى اراسىنداعى ديالوگ اياسىندا كوتەرۋگە دايىن.
2024 جىلدىڭ اقپان ايىنىڭ باسىندا ازەربايجان سىرتقى ىستەر مينيسترلىگى رەسەيگە «ورىس ءۇيى» وكىلدىگىن جابۋ تۋرالى نوتا جولداعان بولاتىن. باكۋ بۇل ۇيىمدى «زاڭدى تۇردە تىركەلمەگەن» جانە «زاڭ بۇزۋشىلىقتارعا جول بەرگەن» دەپ ايىپتادى.
ال «روسسوترۋدنيچەستۆو» باسشىسى ەۆگەني پريماكوۆ بۇل تالاپ «ورىس ءۇيىنىڭ» ازەربايجان زاڭناماسىنا سايكەس تىركەلمەۋىمەن بايلانىستى ەكەنىن ايتتى. ونىڭ ايتۋىنشا، باكۋ بۇل ماسەلەنى رەتتەۋگە كومەكتەسۋدەن باس تارتقان.
پريماكوۆ بۇل جاعدايدى 2024 جىلدىڭ سوڭىندا اقتاۋدا ورىن العان «ازەربايجان اۋە جولدارى» (AZAL) ۇشاعىنىڭ اپاتىمەن بايلانىستىردى. سول كەزدە ازەربايجان پرەزيدەنتى يلحام اليەۆ ۇشاققا سىرتقى راديوەلەكتروندىق شابۋىل جاسالعانىن ايتىپ، رەسەيدەن وتەماقى تالاپ ەتكەن.
رەسەي سىرتقى ىستەر مينيسترلىگى باكۋدەگى «ورىس ءۇيى» قىزمەتىنە قاتىستى ايىپتاۋلاردى نەگىزسىز دەپ اتادى. مينيسترلىك ازەربايجاننىڭ ماسكەۋدەگى ەلشىسى راحمان مۋستافاەۆتى شاقىرىپ، ماسەلە بويىنشا تۇسىنىكتەمە سۇراعانىن حابارلادى.
ايتا كەتەيىك، ازەربايجان AZAL ۇشاعىنىڭ اپاتقا ۇشىراۋىنا بايلانىستى رەسەيگە قارسى حالىقارالىق سوتقا شاعىمدانۋ ءۇشىن دايىندىق جۇمىستارىن جۇرگىزىپ جاتقانى تۋرالى جازعان ەدىك.
بۇعان دەيىن حالىقارالىق ساراپتاما بارىسىندا اقتاۋدا اپاتقا ۇشىراعان ۇشاقتان «پانتسير-س» زىمىرانىنىڭ بولشەگى تابىلعانى تۋرالى باق-تا حابارلانعان.
