ازەربايجان پرەزيدەنتى يلحام اليەۆ Al Arabiya تەلەارناسىنا بەرگەن سۇحباتىندا ەلىنىڭ كسرو قۇرامىنا «باسقىنشىلىق» جانە «وككۋپاتسيا» ارقىلى ەنگەنىن ايتتى، دەپ حابارلايدى "ادىرنا" ۇلتتىق پورتالى Tengrinews.kz-كە سىلتەپ.
مەملەكەت باسشىسى بۇل پىكىرىن زاڭگەزۋر ءدالىزىن ىسكە اسىرۋ جوسپارلارىنا قاتىستى سۇراققا جاۋاپ بەرۋ بارىسىندا جەتكىزدى. ول ازەربايجاننىڭ ەكىگە ءبولىنۋى 1920 جىلى رەسەي اسكەرىنىڭ باسىپ كىرۋىنەن باستالعانىن ەسكە سالدى.
«1918 جىلى قۇرىلعان ازەربايجان دەموكراتيالىق رەسپۋبليكاسى العاشقى مۇسىلماندىق دەموكراتيالىق مەملەكەت بولدى. الايدا 1920 جىلى ساۋىردە رەسەي ارمياسى ەلگە باسىپ كىرىپ، ءبىزدىڭ تاۋەلسىزدىگىمىزدى تارتىپ الدى. كەيىن سول جىلدىڭ قاراشاسىندا زاڭگەزۋر ءوڭىرىن ارمەنياعا بەرىپ، ازەربايجاندى ەكىگە ءبولدى»، – دەدى اليەۆ.
ونىڭ ايتۋىنشا، كەڭەس داۋىرىندە شەكارالار مەن كەدەرگىلەر بولماعاندىقتان ماسەلە وزەكتى ەمەس ەدى. بىراق كەيىن ارمەنيا كولىك قاتىناسىن جاۋىپ تاستاعاننان بەرى ناحچىۆانعا جەتۋ قيىندىق تۋعىزىپ وتىر.
