ازەربايجان استاناسى باكۋدىڭ ياسامال اۋدانىندا ورنالاسقان دج.دجاببارلى اتىنداعى كينوستۋديانىڭ پيروتەحنيكا قويماسىندا جارىلىس بولدى. ءبۇل تۋرالى Trend جازدى، دەپ حابارلايدى “ادىرنا”.
ازەربايجان ىشكى ىستەر مينيسترلىگى ءباسپاسوز قىزمەتىنىڭ حابارلاۋىنشا، قازىرگى تاڭدا قاۋىپسىزدىك شارالارى قولعا الىنىپ جاتىر. وقيعا ورنىنا پوليتسيا قىزمەتكەرلەرى جەتتى.
الدىن الا مالىمەتتەرگە سايكەس، ءتۇسىرىلىم كەزىندە قولدانىلعان جارىلعىش زات جارىلىپ كەتكەن. جارىلىستان كەيىن كينوستۋديادا كۇشتى ءورت شىققان.
باستاپقىدا كۋالار جارىلىستىڭ داۋىسىن فەيەرۆەرك دەپ ويلاعان.
اقپاراتقا سايكەس، ازاماتتار اراسىندا زارداپ شەككەندەر جوق، جارىلىس بولعان ايماقتى پوليتسيا باقىلاۋعا الدى. ءورت ءسوندىرۋ جۇمىستارى جۇرگىزىلدى.
ۇقساس جاڭالىقتار
