ازەربايجان AZAL ۇشاعىنىڭ اپاتقا ۇشىراۋىنا بايلانىستى رەسەيگە قارسى حالىقارالىق سوتقا شاعىمدانۋ ءۇشىن دايىندىق جۇمىستارىن جۇرگىزىپ جاتىر. بۇل تۋرالى ازەربايجان ارا اقپارات اگەنتتىگى جاريالادى، دەپ حابارلايدى “ادىرنا” ۇلتتىق پورتالى.
اگەنتتىكتىڭ حابارلاماسىندا ايتىلعانداي، ازەربايجان رەسەيگە قويعان تالاپتارىن جانە شارتتارىن ناقتى انىقتاپ، ولاردى جوعارى دەڭگەيدە جاريالاعان.
«الدىن الا ايتىلعانداي، ازەربايجاننىڭ قولىندا ۇشاقتى اتىپ تۇسىرگەن پانتسير-س زىمىران جۇيەسىنىڭ بولشەكتەرى بار. دالەلدەمەلىك بازا قالىپتاسىپ، فاكتىلەر مەن ايعاقتار جيناقتالۋدا، حالىقارالىق سوتقا شاعىم جاساۋعا دايىندىق ءجۇرىپ جاتىر»، – دەپ حابارلايدى APA.
سونداي-اق، جاريالانىمدا «رەسەيمەن ديالوگقا اشىق ەسىك بار ەكەندىگى» اتاپ وتىلگەن.
«ماسكەۋ ءوز كىناسىن اشىق مويىنداپ، جاۋاپكەرشىلىكتى ءوز موينىنا الۋى ءتيىس. ايتپەگەن جاعدايدا باكۋ كەلەسى قادامدارعا دايىن»، – دەپ كورسەتىلگەن حابارلامادا.
ەسكە سالساق، وتكەن سەيسەنبىدە قازاقستاننىڭ كولىك مينيسترلىگى اقتاۋ ماڭىندا 25 جەلتوقساندا قۇلاعان AZAL ۇشاعىنىڭ اپاتقا ۇشىراۋ سەبەپتەرى بويىنشا الدىن الا تەرگەۋ ناتيجەلەرىن جاريالاعان بولاتىن.
