رەسەي ءۇندىستاننان تەڭىز ارقىلى بەنزين يمپورتتاي باستادى. بۇل تۋرالى Reuters جازدى، دەپ حابارلايدى «ادىرنا» ءتىلشىسى.
اگەنتتىك مالىمەتىنشە، ءۇندىستاننان كەمىندە 60 مىڭ توننا بەنزين جونەلتىلگەن. دەرەككوزدەردىڭ ءبىرىنىڭ ايتۋىنشا، رەسەيگە ارقايسىسى 30-40 مىڭ توننا جانارماي تاسىمالدايتىن ەكى تانكەر باعىتتالعان.
الداعى ۋاقىتتا رەسەي ءارتۇرلى ەلدەردەن اي سايىن شامامەن 400 مىڭ توننا بەنزين يمپورتتاۋدى جوسپارلاپ وتىرعانى دا ايتىلدى. شەتەلدىك باق مالىمەتىنشە، ءۇندىستاننان بولەك، جانارماي جەتكىزۋدى بەلارۋس تە جۇزەگە اسىرىپ جاتىر.
ايتا كەتەيىك، ءۇندىستاننىڭ ءوزى رەسەي مۇنايىنىڭ ءىرى ساتىپ الۋشىسى سانالادى. ماۋسىم ايىندا ءۇندى نارىعىنا رەسەيلىك مۇناي يمپورتى تاۋلىگىنە شامامەن 2,7 ميلليون باررەلگە جەتىپ، ەلدىڭ جالپى مۇناي يمپورتىنىڭ جارتىسىنان استامىن قۇرادى.
جەكسەنبى كۇنى رەسەي پرەزيدەنتى ۆلاديمير پۋتين ۋكراينالىق درونداردىڭ مۇناي وڭدەۋ زاۋىتتارىنا جاساعان شابۋىلدارى كەيبىر وڭىردە وتىن تاپشىلىعىن تۋعىزعانىن ايتىپ، ماسەلەنى شەشۋ ءۇشىن ءتيىستى شارالار قابىلدانىپ جاتقانىن جەتكىزگەن.
بۇعان دەيىن كرەمل رەسەيدىڭ وزگە مەملەكەتتەرمەن بايلانىس ورناتىپ، جانارماي يمپورتتاۋ ماسەلەسىن تالقىلاپ جاتقانىن راستاعان بولاتىن. Reuters اگەنتتىگى رەسەيدىڭ قازاقستاننان شامامەن 50 مىڭ توننا اي-92 بەنزينىن جەتكىزۋدى سۇراعانىن حابارلاعان ەدى.
سونداي-اق بۇگىن، 1 شىلدەدە رەسەيدەن جانارمايدىڭ 90 پايىزدان استامىن يمپورتتايتىن قىرعىزستاننىڭ قازاقستان، بەلارۋس، ازەربايجان جانە باسقا دا ەلدەرمەن جانار-جاعارماي جەتكىزۋ جونىندە كەلىسسوزدەر جۇرگىزىپ جاتقانى بەلگىلى بولدى.
