رەسەيدىڭ "يزۆەستيا" باسىلىمى قازاقستان پرەزيدەنتى قاسىم-جومارت توقاەۆتىڭ «قازاقستان مەن رەسەي: ستراتەگيالىق سەرىكتەستىكتىڭ جاڭا كوكجيەگى» اتتى ماقالاسىن جاريالادى، دەپ حابارلايدى "ادىرنا" ۇلتتىق پورتالى.
ماقالادا ەكى ەل اراسىنداعى ىنتىماقتاستىقتىڭ دامۋى مەن بولاشاعى تۋرالى ماڭىزدى مالىمەتتەر بەرىلگەن.
پرەزيدەنت قاسىم-جومارت توقاەۆ قازاقستان مەن رەسەي اراسىنداعى قارىم-قاتىناستاردىڭ سەنىمدىلىگى مەن تۇراقتىلىعىن اتاپ ءوتىپ، رەسەي پرەزيدەنتى ۆلاديمير پۋتينمەن تۇراقتى جانە اشىق بايلانىستار ورناعانىن ايتتى. بۇل قارىم-قاتىناس تۋىنداعان ماسەلەلەردى جەدەل شەشۋگە جانە ەلدەر اراسىنداعى دوستىق قاتىناستاردى نىعايتۋعا ىقپال ەتۋدە.
ماقالادا سوڭعى ءبىر جىل ىشىندە قازاقستان مەن رەسەيدىڭ بىرنەشە رەت جوعارى دەڭگەيدە كەزدەسۋلەر وتكىزگەنى ايتىلعان. بۇل كەزدەسۋلەر تولىق فورماتتى كەلىسسوزدەردەن، حالىقارالىق شارالار اياسىنداعى كەزدەسۋلەر مەن تەلەفون ارقىلى سويلەسۋلەردەن تۇردى.
قازاقستان مەن رەسەي اراسىنداعى ساۋدا-ەكونوميكالىق ىنتىماقتاستىقتىڭ دامىپ كەلە جاتقانى ەرەكشە اتاپ ءوتىلدى. قازىرگى تاڭدا قازاقستاندا 23 مىڭنان استام رەسەيلىك كومپانيا جۇمىس ىستەپ جاتىر، ونىڭ ىشىندە سوڭعى جىلى اشىلعان 4 مىڭ جاڭا كومپانيا بار. بۇل ەكى ەلدىڭ ەكونوميكالىق بايلانىسىنىڭ جوعارى ديناميكاسىن كورسەتەدى.
سونىمەن قاتار، ماقالادا ەنەرگەتيكا، ونەركاسىپ، كولىك-لوگيستيكا، اۋىل شارۋاشىلىعى جانە باسقا دا سالالارداعى ءىرى بىرلەسكەن جوبالارعا نازار اۋدارىلدى. جالپى قۇنى 18 ميلليارد دوللاردان اساتىن 90-نان استام جوبا جۇزەگە اسىرىلعان، ال تاعى 49 پەرسپەكتيۆالىق جوبا ىسكە اسىرىلۋ ساتىسىندا.
ماقالادا ەۋرازيالىق ەكونوميكالىق وداق اياسىنداعى قازاقستان مەن رەسەي اراسىنداعى ىنتىماقتاستىقتىڭ ماڭىزدىلىعى دا قوزعالعان. ەاەو ءوزىنىڭ تيىمدىلىگىن دالەلدەپ، ەكونوميكالىق ساياساتتى ينتەگراتسيالاۋ مەن ءوزارا ساۋدانى دامىتۋ ءۇشىن ماڭىزدى پلاتفورماعا اينالعانى ايتىلدى.
ەسكە سالا كەتەيىك، قاسىم-جومارت توقاەۆتىڭ شاقىرۋىمەن 27 قاراشادا قازاقستانعا رەسەي پرەزيدەنتى ۆلاديمير پۋتين مەملەكەتتىك ساپارمەن كەلەدى. ساپار اياسىندا جوعارى دەڭگەيدەگى كەلىسسوزدەر وتەدى. مەملەكەت باسشىلارى بەينەكونفەرەنتسيا رەجيمىندە وتەتىن قازاقستان مەن رەسەيدىڭ حح وڭىرارالىق ىنتىماقتاستىق فورۋمىنا قاتىسادى.
28 قاراشادا توقاەۆتىڭ توراعالىعىمەن ۇجىمدىق قاۋىپسىزدىك تۋرالى شارت ۇيىمى كەڭەسىنىڭ كەزەكتى سەسسياسى وتەدى. قاتىسۋشى ەلدەردىڭ دەلەگاتسيالارى وڭىرلىك جانە حالىقارالىق قاۋىپسىزدىك ماسەلەلەرىن تالقىلايدى. وتىرىستىڭ قورىتىندىسى بويىنشا بىرقاتار قۇجات قابىلدانادى.
