استانا قالاسىنىڭ اكىمشىلىك قۇقىق بۇزۋشىلىق ىستەر جونىندەگى مامانداندىرىلعان اۋدانارالىق سوتى الەۋمەتتىك جەلىدە "جالا جاپقانى ءۇشىن" ازامات ب.-عا قاتىستى ءىستى قارادى. بۇل تۋرالى سوتتىڭ ءباسپاسوز قىزمەتى جاريالادى، دەپ حابارلايدى “ادىرنا” ۇلتتىق پورتالى.
سوتتىڭ انىقتاعانى بويىنشا، ازامات الەۋمەتتىك جەلىلەردە ۆيدەو جاريالاپ، وندا ءبىر ءۇيدى كورسەتىپ، ونىڭ استانا قالاسىنىڭ باس يمامىنا تيەسىلى ەكەنىن جانە حالىقتىڭ قايىرىمدىلىق اقشاسىنا سالىنعانىن ايتقان. وسىلايشا، ول الەۋمەتتىك جەلىلەردە قاساقانا جالعان اقپارات تاراتقان، بۇل باسقا ادامنىڭ ابىرويى مەن قادىر-قاسيەتىن تاپتاپ، بەدەلىنە نۇقسان كەلتىرگەن.
سوت وتىرىسىندا قۇقىق بۇزۋشى ءوز كىناسىن تولىق مويىنداپ، وكىنىش ءبىلدىردى. ول ءۇيدىڭ كىمگە تيەسىلى ەكەنىن جانە قانداي قاراجاتقا سالىنعانىن ناقتى بىلمەيتىنىن ايتىپ، ۆيدەونى تەك كورۋ ءۇشىن جاريالاعانىن ءتۇسىندىردى. جابىرلەنۋشى بولسا، سوتتان كىنالىگە زاڭ بويىنشا جازا تاعايىنداۋدى سۇرادى.
اكىمشىلىك قۇقىق بۇزۋشىلىق تۋرالى كودەكستىڭ سايكەس بابىندا 180 ايلىق ەسەپتىك كورسەتكىش (2025 جىلى 707 760 تەڭگە) كولەمىندە ايىپپۇل نەمەسە 20 كۇنگە دەيىن اكىمشىلىك قاماۋعا الۋ جازاسى كوزدەلگەن.
سوت جازا تاعايىنداۋ كەزىندە قۇقىق بۇزۋشىنىڭ كىناسىن مويىنداعانى جانە شىن جۇرەكتەن وكىنىش ءبىلدىرۋىن جەڭىلدەتەتىن جاعداي رەتىندە ەسكەردى. الەۋمەتتىك اۋىرلاتاتىن ءمان-جايلار انىقتالمادى.
«سوتتىڭ قاۋلىسىمەن ب. اكىمشىلىك قۇقىق بۇزۋشىلىق جاسادى دەپ تانىلىپ، وعان 180 ايلىق ەسەپتىك كورسەتكىش كولەمىندە ايىپپۇل سالىندى. قاۋلى زاڭدى كۇشىنە ەنگەن جوق»، - دەپ حابارلادى سوت.
