Astana qalasynyń Ákimshilik quqyq buzýshylyq ister jónindegi mamandandyrylǵan aýdanaralyq soty áleýmettik jelide "jala japqany úshin" azamat B.-ǵa qatysty isti qarady. Bul týraly sottyń baspasóz qyzmeti jarııalady, dep habarlaıdy “Adyrna” ulttyq portaly.
Sottyń anyqtaǵany boıynsha, azamat áleýmettik jelilerde vıdeo jarııalap, onda bir úıdi kórsetip, onyń Astana qalasynyń bas ımamyna tıesili ekenin jáne halyqtyń qaıyrymdylyq aqshasyna salynǵanyn aıtqan. Osylaısha, ol áleýmettik jelilerde qasaqana jalǵan aqparat taratqan, bul basqa adamnyń abyroıy men qadir-qasıetin taptap, bedeline nuqsan keltirgen.
Sot otyrysynda quqyq buzýshy óz kinásin tolyq moıyndap, ókinish bildirdi. Ol úıdiń kimge tıesili ekenin jáne qandaı qarajatqa salynǵanyn naqty bilmeıtinin aıtyp, vıdeony tek kórý úshin jarııalaǵanyn túsindirdi. Jábirlenýshi bolsa, sottan kinálige zań boıynsha jaza taǵaıyndaýdy surady.
Ákimshilik quqyq buzýshylyq týraly kodekstiń sáıkes babynda 180 aılyq eseptik kórsetkish (2025 jyly 707 760 teńge) kóleminde aıyppul nemese 20 kúnge deıin ákimshilik qamaýǵa alý jazasy kózdelgen.
Sot jaza taǵaıyndaý kezinde quqyq buzýshynyń kinásin moıyndaǵany jáne shyn júrekten ókinish bildirýin jeńildetetin jaǵdaı retinde eskerdi. Áleýmettik aýyrlatatyn mán-jaılar anyqtalmady.
«Sottyń qaýlysymen B. ákimshilik quqyq buzýshylyq jasady dep tanylyp, oǵan 180 aılyq eseptik kórsetkish kóleminde aıyppul salyndy. Qaýly zańdy kúshine engen joq», - dep habarlady sot.
