قازاقستاندا قولما-قول تولەم عانا قابىلدايتىن كاسىپكەرلەرگە ايىپپۇل سالىنادى. بۇل تۋرالى مەملەكەتتىك كىرىستەر كوميتەتى ايتتى، دەپ حابارلايدى «ادىرنا» ءتىلشىسى.
«قولما-قول اقشاسىز تولەمدەردى قابىلداۋدان باس تارتۋ زاڭسىز بولىپ تابىلادى جانە تۇتىنۋشىلاردىڭ قۇقىقتارىن بۇزادى. كاسىپكەرلەردىڭ تولەم كارتالارىن پايدالانا وتىرىپ تولەمدەردى قابىلداۋدان باس تارتقانى ءۇشىن ءبىرىنشى رەت اكىمشىلىك جاۋاپكەرشىلىككە تارتىلىپ, ەسكەرتۋ جاسالادى, ال قايتالاپ بۇزعان جاعدايدا – 147 680 تەڭگە (40 اەك) كولەمىندە ايىپپۇل سالىنادى»،—دەپ ءتۇسىندىردى باسقارما.
ايتۋلارىنشا، ءموبيلدى اۋدارىمداردى تەكسەرۋ زاڭسىز كاسىپكەرلىك قىزمەتتى كولەڭكەدەن شىعارۋعا باعىتتالعان.
«كەيبىر كاسىپكەرلەر ساتىلعان تاۋارلار نەمەسە قىزمەتتەر ءۇشىن تولەمدى ءموبيلدى اۋدارىمدار ارقىلى الادى. الايدا، بۇل اۋدارىمدار كاسسالىق اپپاراتتاردى، POS-تەرمينالداردى جانە QR-كودتاردى قولدانباي جۇرگىزىلەدى. تيىسىنشە، چەكتەر بەرىلمەيدى جانە تۇتىنۋشىلاردىڭ قۇقىقتارى بۇزىلادى. مەملەكەت بارلىق ءموبيلدى اۋدارمانى تەكسەرمەيدى. تەك ءارءتۇرلى تۇلعالاردان ءۇش اي قاتارىنان اي سايىن 100 نەمەسە ودان دا كوپ ءموبيلدى اۋدارىمدار العان تۇلعالار عانا، ياعني، كاسىپكەرلىك قىزمەتتىڭ بەلگىلەرى بايقالعان جاعدايدا تەكسەرۋ جۇرگىزىلەدى»،—دەپ تولىقتىردى كوميتەت.
بۇدان بولەك باسقارما كاسىپكەر قولما-قول اقشاسىز تولەم قابىلداۋدان باس تارتسا، قايدا جۇگىنۋگە بولاتىنىن ايتتى.
«قولما-قول اقشاسىز تولەمدەردى قابىلداۋدان باس تارتۋ فاكتىلەرى تۋرالى تۇرعىلىقتى جەرى بويىنشا مەملەكەتتىك كىرىس ورگاندارىنا جۇگىنۋ قاجەت»،—دەلىنگەن حابارلامادا.
