تۇركيانىڭ ىستانبۇل قالاسىندا قازاق دراماتۋرگى، جازۋشى، جۋرناليست دۋمان رامازانعا «تۇركى الەمىنىڭ ەڭ ۇزدىك دراماتۋرگى» اتاعى سالتاناتتى تۇردە تابىستالدى. بۇل تۋرالى قىرعىز جازۋشىسى، تۇركسوي ۇيىمىنىڭ باس حاتشىسى سۇلتان راەۆ Facebook پاراقشاسىندا جاريالادى، دەپ حابارلايدى “ادىرنا” ۇلتتىق پورتالى.
“دۋمان رامازان باۋىرىمنىڭ درامالارىمەن بۇرىننان تانىسپىن. كۇشتى دراماتۋرگ، درامانىڭ وي-قىرلارىن تەرەڭدەتكەن، تاريحي تاقىرىپتا دا، قازىرگى زامان تاقىرىبىندا دا جازعان شىعارمالارى وتە زەرتتەلىپ، ىشكى قاراما-قايشىلىقتى، ەپيكالىق شيەلەنىستى ەرەكشە ءبىر جۇيەلى ستيلدە بايانداعانى ايقىن ەرەكشەلىگى بار. دۋمان قازاق دراماتۋرگياسىنداعى جاڭا كورىنىس، ەستەتيكالىق قۇبىلىس، جاڭا بەلەس. سوڭعى جىلدارى ول ۇلتتىق ساحنادا جاساعان تاريحي پولوتنولارى بۇگىنگى تەاتردىڭ بيىگىنە قانات قاققان. «كەرەي - جانىبەك»، «ابىلاي حاننىڭ ارمانى»، «جوشى حان» جانە باسقا دا تاريحي درامالارى ۇلتتىق قۇندىلىقتار مەن داستۇرلەرگە دەگەن تاريحي كوزقاراستى كوركەم تۋىندىلاردا بەينەلەگەن. استاناداعى كۋبانىشباەۆ اتىنداعى ۇلتتىق دراما تەاترىنىڭ ساحناسىندا قويىلعان «جوشى حان» تاريحي دراماسى قازاق مادەنيەتىندەگى جاڭا كەزەڭدى كورسەتەدى”، دەپ جازدى راەۆ.
