2025 جىلعى قاڭتاردا ەلىمىزدە ينفلياتسيا ۇدەپ، ءبىر جىلدا 8,9 پايىزدى (2024 جىلعى جەلتوقساندا – 8,6%), ءبىر ايدا – 1,1 پايىزدى قۇرادى. بۇل تۋرالى ۇلتتىق ستاتيستيكا بيۋروسى ايتتى، دەپ حابارلايدى «ادىرنا» ءتىلشىسى.
ءبىر جىل ىشىندە اقىلى قىزمەتتەر باعاسى 13,8 پايىز (2024 جىلعى جەلتوقساندا – 13,3 پايىز), ازىق-تۇلىككە جاتپايتىن تاۋارلار باعاسى – 8,4 پايىز، ازىق-تۇلىك باعاسى 5,8 پايىز وسكەن.
بىلتىرعى ءدال وسى كەزەڭمەن سالىستىرعاندا سۋىق سۋ ءتاريفى 43,2 پايىز، سۋ بۇرۋ – 26,1 پايىز، ورتالىقتان جىلىتۋ قىزمەتى – 23,1 پايىز، ىستىق سۋ – 21,3 پايىز، ەلەكتر ەنەرگياسى – 18,9 پايىز، جەلىلەر ارقىلى تاراتىلاتىن گاز – 12 پايىز، قوقىس شىعارۋ 10,3 پايىز كوتەرىلگەن. ۇيالى بايلانىس قىزمەتتەرى – 16,8 پايىز، دەنساۋلىق ساقتاۋ قىزمەتتەرى – 12 پايىز، قوعامدىق تاماقتانۋ قىزمەتتەرى 10,9 پايىز قىمباتتاعان.
قاڭتاردا ينفلياتسيا دەڭگەيى رەسپۋبليكانىڭ ون ەكى وڭىرىندە ورتاشا رەسپۋبليكالىق كورسەتكىشتەن جوعارى بولدى. اسىرەسە، استانا قالاسى (11,2%), قاراعاندى (9,9%), باتىس قازاقستان (9,7%) جانە سولتۇستىك قازاقستان (9,6%) وبلىستارىندا ينفلياتسيا قارقىن العان.
