ۋكراينا پرەزيدەنتىنىڭ كوممۋنيكاتسيالار جونىندەگى كەڭەسشىسى دميتري ليتۆين اقش-تىڭ ارنايى وكىلى كيت كەللوگگتىڭ جىل سوڭىنا دەيىن ەلدە سايلاۋ وتكىزۋ تۋرالى ۇسىنىسىنا قارسىلىق ءبىلدىردى، دەپ حابارلايدى «ادىرنا» ءتىلشىسى Deutsche Welle-گە سىلتەمە جاساپ.
«ءبىز كەللوگ مىرزانىڭ سۇحباتىن تولىق قاراپ شىققان جوقپىز، تەك سايلاۋ تۋرالى ايتقان بىرنەشە دايەكسوزىن كوزىمىز شالدى. سول سەبەپتى ۇستانىمىن تولىق باعالاۋ قيىن. دەسە، ونىڭ جوسپارى تەك اتىستى توقتاتۋ جانە سايلاۋ بولسا، وندا بۇل ءساتسىز جوسپار ەكەنىن ايتقىم كەلەدى. ءپۋتيندى تەك وسى ەكى نارسەمەن قورقىتا المايمىز»،–دەدى ول.
سونداي-اق ليتۆين رەسەيدەگى احۋالعا دا توقتالدى.
«ماسكەۋ زىمىراندار مەن وق-دارىلەر ءوندىرىسىن ۇلعايتۋدى، سانكتسيالاردى اينالىپ ءوتۋدىڭ جانە مۇنايدان اقشا تابۋدىڭ جاڭا جولدارىن تابۋدى جالعاستىرۋدا. بۇل قارۋدىڭ ءبارى دەموكراتيالىق كورشىلەردى قۇرمەتتەۋ ءۇشىن جاسالمايتىنى انىق. رەسەيدىڭ سولتۇستىك كورەيامەن اسكەري وداق قۇرۋى دا اتىستى توقتاتۋ قۇرمەتىنە بايلانىستى ەمەس»،—دەپ تولىقتىردى كەڭەسشى.
بۇعان دەيىن اقش پرەزيدەنتى دونالد ترامپتىڭ ۋكراينا بويىنشا ارنايى ۋاكىلى كيت كەللوگ ۋكرايناعا جىل سوڭىنا دەيىن پرەزيدەنت جانە پارلامەنت سايلاۋىن وتكىزۋدى ۇسىنعان بولاتىن. ول سايلاۋ ۋكرايناداعى دەموكراتيا ءۇشىن ماڭىزدى ەكەنىن اتاپ ءوتتى.
