ناتو-نىڭ باس حاتشىسى مارك ريۋتتە ەۋروپا ەلدەرىن قورعانىسقا جۇمسالاتىن شىعىنداردى ارتتىرۋعا جانە سوعىسقا دايىندالۋعا شاقىردى، دەپ حابارلايدى "ادىرنا" ۇلتتىق پورتالى.
ول بۇل مالىمدەمەنى Bild گازەتىنە بەرگەن سۇحباتىندا ايتقان.
ريۋتتە بەرليندى اسكەري ونەركاسىپ پەن قورعانىس سالاسىنا كوبىرەك قاراجات جۇمساۋعا جانە ءوندىرىستى ارتتىرۋعا ۇندەدى. ونىڭ ايتۋىنشا، بۇل ماسەلە الداعى ايلاردا كوپتەگەن ەۋروپالىق ەلدەردە قىزۋ تالقىلاناتىن بولادى.
"مەن سىزدەرگە اشىق ايتايىن، ءبىز سوعىسقا دايىندالۋىمىز كەرەك. بۇل – سوعىستىڭ الدىن الۋدىڭ ەڭ ءتيىمدى جولى،" – دەدى ريۋتتە.
بۇعان دەيىن امەريكالىق تەلەجۇرگىزۋشى تاكەر كارلسون ناتو-نىڭ قازىرگى ۋاقىتتا ءوز ماڭىزدىلىعىن جوعالتقانىن مالىمدەگەن ەدى. ول بۇل اسكەري اليانستىڭ باستاپقىدا كسرو-نى تەجەۋ ءۇشىن قۇرىلعانىن، الايدا سودان بەرى 35 جىل وتكەنىن اتاپ ءوتتى.
سونىمەن قاتار، كارلسون ناتو-نىڭ باستى ماقساتى بەيبىتشىلىكتى ساقتاۋ بولعانىمەن، قازىر ەۋروپادا سوڭعى 80 جىلداعى ەڭ ءىرى سوعىس ءجۇرىپ جاتقانىن ايتىپ، اليانستىڭ تيىمدىلىگىنە كۇمان كەلتىردى.
