قۇراندى ورتەۋگە تىيىم سالىنباعان — ناتو-نىڭ باس حاتشىسى

1874
Adyrna.kz Telegram

ناتو-نىڭ باس حاتشىسى يەنس ستولتەنبەرگ شۆەتسيادا مۇسىلمانداردىڭ قاسيەتتى كىتابى ورتەلگەنىنە بايلانىستى پىكىر ءبىلدىردى. ول ەلدە قۇراندى ورتەۋگە زاڭ بويىنشا تىيىم سالىنباعانىن مالىمدەدى، دەپ حابارلايدى «ادىرنا» ءتىلشىسى.

«مەن بۇل وقيعا تۋدىرعان سەزىمدەر مەن ەموتسيانىڭ تەرەڭدىگىن تۇسىنەمىن. دەسە دە،
قورلايتىن جانە ايىپتاۋعا جاتاتىن ارەكەتتەر زايىرلى زاڭ جۇيەسىندە مىندەتتى تۇردە زاڭسىز بولىپ تابىلمايدى. زاڭ بويىنشا  تىيىم سالىنباعان. شۆەتسياداعى تۇركياعا جانە ناتو-عا قارسى نارازىلىقتى دا كوردىك. مۇنىڭ ءبارى ماعان ۇنامايدى. ادامداردىڭ كەلىسپەۋ قۇقىعىن قورعايتىن بولامىن. سەبەبى بۇل — ءوز ويىن جەتكىزۋ ەركىندىگى»،—دەدى ول.

ەسكە سالايىق، شۆەتسيا پوليتسياسى 28 ماۋسىمدا مۇسىلمانداردىڭ قۇربان ايت مەرەكەسىنىڭ ءبىرىنشى كۇنى ستوكگولمدەگى مەشىتتىڭ سىرتىندا قۇراندى ورتەپ جىبەرۋگە رۇقسات بەرگەن ەدى. ەل استاناسىندا قاسيەتتى كىتاپ وسىمەن ەكىنشى رەت ورتەلدى.

قازىرگى تاڭدا شۆەتسيانىڭ ناتو مۇشەلىگىنە ءوتۋ ماسەلەسى قاراستىرىلىپ جاتىر. بۇعان تۇركيا قارسى بولىپ وتىر. ويتكەنى قاڭتار ايىندا دانيالىق راسمۋس پالۋدان ستوكگولمدەگى تۇرىك ەلشىلىگىنىڭ الدىندا قۇراندى ورتەپ، تۇرىكتەردىڭ قارسىلىعىن كۇشەيتكەن ەدى.

پىكىرلەر