NATO-nyń bas hatshysy Mark Rıýtte Eýropa elderin qorǵanysqa jumsalatyn shyǵyndardy arttyrýǵa jáne soǵysqa daıyndalýǵa shaqyrdy, dep habarlaıdy "Adyrna" ulttyq portaly.
Ol bul málimdemeni Bild gazetine bergen suhbatynda aıtqan.
Rıýtte Berlındi áskerı ónerkásip pen qorǵanys salasyna kóbirek qarajat jumsaýǵa jáne óndiristi arttyrýǵa úndedi. Onyń aıtýynsha, bul másele aldaǵy aılarda kóptegen eýropalyq elderde qyzý talqylanatyn bolady.
"Men sizderge ashyq aıtaıyn, biz soǵysqa daıyndalýymyz kerek. Bul – soǵystyń aldyn alýdyń eń tıimdi joly," – dedi Rıýtte.
Buǵan deıin amerıkalyq telejúrgizýshi Taker Karlson NATO-nyń qazirgi ýaqytta óz mańyzdylyǵyn joǵaltqanyn málimdegen edi. Ol bul áskerı alıanstyń bastapqyda KSRO-ny tejeý úshin qurylǵanyn, alaıda sodan beri 35 jyl ótkenin atap ótti.
Sonymen qatar, Karlson NATO-nyń basty maqsaty beıbitshilikti saqtaý bolǵanymen, qazir Eýropada sońǵy 80 jyldaǵy eń iri soǵys júrip jatqanyn aıtyp, alıanstyń tıimdiligine kúmán keltirdi.
