رەسەي پرەمەر-ءمينيسترى قىرعىزستان بيلىگىنىڭ رەسەيلىك كومپانيالارعا قىسىم كورسەتۋىنە الاڭداۋشىلىق ءبىلدىردى، دەپ حابارلايدى "ادىرنا" ۇلتتىق پورتالى فەرعاناعا سىلتەپ.
رەسەيدىڭ پرەمەر-ءمينيسترى ميحايل ميشۋستين قىرعىزستان ۇكىمەتىنىڭ رەسەيلىك كومپانيالارعا قاتىستى "نەگىزسىز تالاپتارى مەن قىسىم كورسەتۋى" ماسەلەسىن كوتەردى.
بۇل ماسەلە استانادا وتكەن كەزدەسۋ بارىسىندا كوتەرىلدى، وندا ميشۋستين قىرعىزستاننىڭ پرەمەر-ءمينيسترى ادىلبەك قاسىماليەۆپەن كەلىسسوزدەر جۇرگىزدى.
ء"بىزدى الاڭداتاتىن بىرقاتار ماسەلەلەر بار. قىرعىزستاننىڭ جوعارى لاۋازىمدى مەملەكەتتىك ورگاندارى ادال، زاڭعا باعىناتىن رەسەيلىك كومپانيالارعا نەگىزسىز تالاپتار قويىپ، قىسىم كورسەتۋدە. بۇل كومپانيالار قىرعىزستان ەكونوميكاسىنىڭ دامۋىنا ۇلەس قوسىپ، جاڭا جۇمىس ورىندارىن اشىپ، ءىرى سالىق تولەۋشىلەر قاتارىندا" – دەدى ميشۋستين.
رەسەي تاراپى بۇل ماسەلەگە بايلانىستى قىرعىزستانعا ديپلوماتيالىق نوتا جىبەرگەنىن مالىمدەدى.
"قىرعىز بيلىگىنەن رەسەيلىك كومپانيالارعا اكىمشىلىك قىسىمدى توقتاتۋدى جانە ينۆەستورلاردىڭ قۇقىقتارىن قورعاۋدى سۇرايمىز", – دەپ قوستى رەسەي ۇكىمەتىنىڭ باسشىسى.
ءوز كەزەگىندە قاسىماليەۆ بۇل ماسەلەنى ەلگە ورالعان سوڭ قايتا قاراستىراتىنىن جانە ماسكەۋدى قوسىمشا حاباردار ەتەتىنىن ايتتى.
كەلىسسوزدەر بارىسىندا ەكى ەل اراسىنداعى ەكونوميكالىق سەرىكتەستىكتى نىعايتۋ ماسەلەسى كوتەرىلدى. وڭدەۋ ونەركاسىبى، ەنەرگەتيكا، كولىك، گەولوگيالىق بارلاۋ جانە تسيفرلىق ەكونوميكا سالالارىندا جاڭا جوبالاردى باستاۋ ۇسىنىلدى.
قىرعىز پرەمەر-ءمينيسترى قىرعىزستان مەن رەسەي اراسىنداعى قارىم-قاتىناستاردىڭ جىلدان جىلعا تەرەڭدەپ كەلە جاتقانىن اتاپ ءوتتى.
كاسىماليەۆتىڭ ايتۋىنشا، قىرعىزستان پرەزيدەنتى سادىر جاپاروۆ 2025 جىلى ماسكەۋدە وتەتىن ۇلى وتان سوعىسىنداعى جەڭىستىڭ 80 جىلدىعىنا ارنالعان سالتاناتتى ءىس-شارالارعا قاتىسادى.
بۇعان دەيىن قازاقستان پرەزيدەنتى قاسىم-جومارت توقاەۆ تا ماسكەۋگە شاقىرتۋ العانىن مالىمدەگەن ەدى.
