Reseı premer-mınıstri Qyrǵyzstan bıliginiń reseılik kompanııalarǵa qysym kórsetýine alańdaýshylyq bildirdi, dep habarlaıdy "Adyrna" ulttyq portaly Ferǵanaǵa siltep.
Reseıdiń premer-mınıstri Mıhaıl Mıshýstın Qyrǵyzstan úkimetiniń reseılik kompanııalarǵa qatysty "negizsiz talaptary men qysym kórsetýi" máselesin kóterdi.
Bul másele Astanada ótken kezdesý barysynda kóterildi, onda Mıshýstın Qyrǵyzstannyń premer-mınıstri Ádilbek Qasymalıevpen kelissózder júrgizdi.
"Bizdi alańdatatyn birqatar máseleler bar. Qyrǵyzstannyń joǵary laýazymdy memlekettik organdary adal, zańǵa baǵynatyn reseılik kompanııalarǵa negizsiz talaptar qoıyp, qysym kórsetýde. Bul kompanııalar Qyrǵyzstan ekonomıkasynyń damýyna úles qosyp, jańa jumys oryndaryn ashyp, iri salyq tóleýshiler qatarynda" – dedi Mıshýstın.
Reseı tarapy bul máselege baılanysty Qyrǵyzstanǵa dıplomatııalyq nota jibergenin málimdedi.
"Qyrǵyz bıliginen reseılik kompanııalarǵa ákimshilik qysymdy toqtatýdy jáne ınvestorlardyń quqyqtaryn qorǵaýdy suraımyz", – dep qosty Reseı úkimetiniń basshysy.
Óz kezeginde Qasymalıev bul máseleni elge oralǵan soń qaıta qarastyratynyn jáne Máskeýdi qosymsha habardar etetinin aıtty.
Kelissózder barysynda eki el arasyndaǵy ekonomıkalyq seriktestikti nyǵaıtý máselesi kóterildi. Óńdeý ónerkásibi, energetıka, kólik, geologııalyq barlaý jáne ıfrlyq ekonomıka salalarynda jańa jobalardy bastaý usynyldy.
Qyrǵyz premer-mınıstri Qyrǵyzstan men Reseı arasyndaǵy qarym-qatynastardyń jyldan jylǵa tereńdep kele jatqanyn atap ótti.
Kasymalıevtiń aıtýynsha, Qyrǵyzstan prezıdenti Sadyr Japarov 2025 jyly Máskeýde ótetin Uly Otan soǵysyndaǵy Jeńistiń 80 jyldyǵyna arnalǵan saltanatty is-sharalarǵa qatysady.
Buǵan deıin Qazaqstan prezıdenti Qasym-Jomart Toqaev ta Máskeýge shaqyrtý alǵanyn málimdegen edi.
