9 عاسىرلىق تاريحى بار اقبيكەش مۇناراسىنىڭ ءبىر بولىگى قيراپ قالدى. بۇل تۋرالى الەۋمەتتىك جەلىدە قوعام بەلسەندىسى جىلبەك كەرىمبەك ارنايى جازبا جاريالاعان، دەپ حابارلايدى “ادىرنا” ۇلتتىق پورتالى قازاقپاراتقا سىلتەپ.
اقپاراتقا سايكەس، سوزاق اۋدانىندا ورنالاسقان اقبيكەش مۇناراسى ءحىى-ءحىىى عاسىرلاردا تۇرعىزىلعان. ورتا عاسىر ەسكەرتكىشى بيىك قىر باسىندا، جەل وتىندە تۇرعانىنا 6 عاسىردان استام ۋاقىت بولعان. دەگەنمەن، جاڭبىر مەن قار سۋىنا شىداس بەرمەگەن تاريحي نىساننىڭ ءبىر بولىگى وپىرىلىپ قالدى.
قوعام بەلسەندىسى جىلبەك كەرىمبەك «قولدا بار تاريحي ەسكەرتكىشتەن ايىرىلدىق» دەپ دابىل قاقتى.
«كەزىندە دابىل قاقتىق، سوزىمىزگە ەشكىم قۇلاق اسپادى. جاۋىن-شاشىن تيمەۋ ءۇشىن توبەسىنە شاتىر جابۋ كەرەك دەدىك. ولاي ىستەمەدى، جاۋعان جاڭبىر، قار سۋى ەسكەرتكىشتىڭ دۋال-قابىرعاسىنا كەۋلەپ كىرىپ، اقىرى قۇلاتتى. بۇدان بۇرىن دا قۇلاعان. ءار قۇلاعان سايىن ىشكى ءوز سىلاعى مەن قىشتى الىپ تۇسەدى. تۇركىستان وبلىسى، سوزاق اۋدانى، اقسۇمبە اۋىلىنداعى «اقبيكەش» مۇناراسىنا جوندەۋ جۇمىستارىن «قازقايتاجاڭارتۋ» رمك رگپ كازرەستاۆراتسيا مەكەمەسى جاساعان»، - دەلىنگەن اۆتوردىڭ جازباسىندا.
ال، قازاقستان رەسپۋبليكاسىنىڭ مادەنيەت قايراتكەرى تورەعالي تاشەنوۆ «مۇنارا جوندەۋسىز تۇرا بەرگەندە 100 جىلعا شىداس بەرەر مە ەدى؟» دەگەن پىكىرىمەن ءبولىستى.
«توبەسىن اشىق قالدىرعاندىقتان، جاۋعان قار مەن سورعالاعان جاڭبىر قويا ما، اقىرى مىناۋ بولدى. سىرتقى دۋالى جەرمەن-جەكسەن قۇلاعاندا ىشىندەگى 6 عاسىرعا شىداس بەرگەن عاجايىپ ەسكەرتكىشتى، مەملەكەت قورعاۋىنداعى تاريحي مۇنارانى وزىمەن بىرگە قوسا جۇلىپ الىپ كەتتى. سۇمدىق. سول بويى جوندەۋسىز-اق تۇرا بەرگەندە، ءالى دە 100 جىلعا شىداس بەرەر مە ەدى؟»، - دەدى تورەعالي تاشەنوۆ.
ماسەلەنىڭ ءمان-جايىن تۇسىندىرمەك بولعان سوزاق اۋدانىنىڭ اكىمدىگى تاريحي جادىگەردىڭ قازىرگى جاعدايى تۋرالى وبلىستىق مادەنيەت باسقارماسىنا شۇعىل حات جولدانعانىن جەتكىزدى.
«اقبيكەش» مۇناراسى قر مادەنيەت جانە سپورت مينيسترلىگىنىڭ رەسپۋبليكالىق دارەجەدەگى ەسكەرتكىشتەر تىزىمىنە ەنگىزىلگەن. «اقبيكەش» مۇناراسىنا 2020 جىلى «قازرەستاۆراتسيا» عىلىمي زەرتتەۋ جانە جوبالاۋ مەملەكەتتىك مەكەمەسىنىڭ قىزىلوردا فيليالى تاراپىنان قالپىنا كەلتىرۋ جۇمىستارى جۇرگىزىلدى. تاپسىرىس بەرۋشى — قازاقستان رەسپۋبليكاسى مادەنيەت جانە اقپارات مينيسترلىگى. 2025 جىلدىڭ 25-26 قاڭتاردا اۋا رايىنىڭ قولايسىزدىعىنا بايلانىستى قار مەن جاڭبىردىڭ سالدارىنان مۇنارانىڭ ءبىر شەتى تاعى قۇلاعان. تاريحي جادىگەردىڭ قازىرگى جاعدايى تۋرالى دەر كەزىندە اۋدان اكىمى تاراپىنان وبلىستىق مادەنيەت باسقارماسىنا شۇعىل حات جولدانعان»، - دەلىنگەن اكىمدىك اقپاراتىندا.
