9 ǵasyrlyq tarıhy bar Aqbıkesh munarasynyń bir bóligi qırap qaldy. Bul týraly áleýmettik jelide qoǵam belsendisi Jylbek Kerimbek arnaıy jazba jarııalaǵan, dep habarlaıdy “Adyrna” ulttyq portaly QazAqparatqa siltep.
Aqparatqa sáıkes, Sozaq aýdanynda ornalasqan Aqbıkesh munarasy HII-HIII ǵasyrlarda turǵyzylǵan. Orta ǵasyr eskertkishi bıik qyr basynda, jel ótinde turǵanyna 6 ǵasyrdan astam ýaqyt bolǵan. Degenmen, jańbyr men qar sýyna shydas bermegen tarıhı nysannyń bir bóligi opyrylyp qaldy.
Qoǵam belsendisi Jylbek Kerimbek «qolda bar tarıhı eskertkishten aıyryldyq» dep dabyl qaqty.
«Kezinde dabyl qaqtyq, sózimizge eshkim qulaq aspady. Jaýyn-shashyn tımeý úshin tóbesine shatyr jabý kerek dedik. Olaı istemedi, jaýǵan jańbyr, qar sýy eskertkishtiń dýal-qabyrǵasyna keýlep kirip, aqyry qulatty. Budan buryn da qulaǵan. Ár qulaǵan saıyn ishki óz sylaǵy men qyshty alyp túsedi. Túrkistan oblysy, Sozaq aýdany, Aqsúmbe aýylyndaǵy «Aqbıkesh» munarasyna jóndeý jumystaryn «Qazqaıtajańartý» RMK RGP Kazrestavraııa mekemesi jasaǵan», - delingen avtordyń jazbasynda.
Al, Qazaqstan Respýblıkasynyń Mádenıet qaıratkeri Tóreǵalı Tashenov «munara jóndeýsiz tura bergende 100 jylǵa shydas berer me edi?» degen pikirimen bólisti.
«Tóbesin ashyq qaldyrǵandyqtan, jaýǵan qar men sorǵalaǵan jańbyr qoıa ma, aqyry mynaý boldy. Syrtqy dýaly jermen-jeksen qulaǵanda ishindegi 6 ǵasyrǵa shydas bergen ǵajaıyp eskertkishti, memleket qorǵaýyndaǵy tarıhı munarany ózimen birge qosa julyp alyp ketti. Sumdyq. Sol boıy jóndeýsiz-aq tura bergende, áli de 100 jylǵa shydas berer me edi?», - dedi Tóreǵalı Tashenov.
Máseleniń mán-jaıyn túsindirmek bolǵan Sozaq aýdanynyń ákimdigi tarıhı jádigerdiń qazirgi jaǵdaıy týraly oblystyq mádenıet basqarmasyna shuǵyl hat joldanǵanyn jetkizdi.
«Aqbıkesh» munarasy QR Mádenıet jáne sport mınıstrliginiń respýblıkalyq dárejedegi eskertkishter tizimine engizilgen. «Aqbıkesh» munarasyna 2020 jyly «Qazrestavraııa» ǵylymı zertteý jáne jobalaý memlekettik mekemesiniń Qyzylorda fılıaly tarapynan qalpyna keltirý jumystary júrgizildi. Tapsyrys berýshi — Qazaqstan Respýblıkasy mádenıet jáne aqparat mınıstrligi. 2025 jyldyń 25-26 qańtarda aýa raıynyń qolaısyzdyǵyna baılanysty qar men jańbyrdyń saldarynan munaranyń bir sheti taǵy qulaǵan. Tarıhı jádigerdiń qazirgi jaǵdaıy týraly der kezinde aýdan ákimi tarapynan oblystyq mádenıet basqarmasyna shuǵyl hat joldanǵan», - delingen ákimdik aqparatynda.
