قمدب شاريعات جانە ءپاتۋا ءبولىمى ايەلدەردىڭ مەشىتتە ناماز وقۋىنا قاتىستى ءوز شەشىمىن جاريا ەتتى، دەپ حابارلايدى “ادىرنا” ۇلتتىق پورتالى Informburo.kz-كە سىلتەپ.
وعان سايكەس، ايەلدەردىڭ مەشىتكە بارىپ جاماعاتپەن ناماز وقۋىنىڭ وقاسى جوق. دەگەنمەن، ولاردىڭ ۇيىندە وقىعانى ابزال.
ءبولىم ساراپشىلارى بۇل رەتتە مۇحاممەد پايعامباردىڭ "ايەلدەرىڭە مەشىتكە بارۋعا تىيىم سالماڭدار. ءبىراق ۇيلەرى ولار ءۇشىن مەشىتكە بارۋدان دا قايىرلى", – دەگەن ءسوزىن العا تارتادى.
"حانافي ءمازھابىنىڭ عالىمدارى فيتناعا (بۇزاقىلىق) ءتۇسىپ قالۋ قاۋپى بولعاندىقتان جاس ايەلدەردىڭ مەشىتكە بارىپ جاماعاتپەن ناماز وقۋىن ماكرۋھ ساناعان. سەبەبى اللا ەلشىسى: "ۇيلەرى ولار ءۇشىن مەشىتكە بارۋدان دا قايىرلى", – دەگەن. ال جاسى ۇلكەن قارت ايەلدەردىڭ تاڭ جانە اقشام مەن قۇپتان نامازدارىندا مەشىتكە بارۋىنا بولادى. بۇل يمام ءابۋ حانيفانىڭ كوزقاراسى. ويتكەنى نيەتى بۇزاقىلار بەسىن مەن ەكىنتى نامازىندا قاپتاپ جۇرەدى. اقشام نامازىندا كەشكى اسىن ىشۋمەن الەك، تاڭ نامازى مەن قۇپتاندا ۇيقىدا بولادى دەيدى. ءابۋ يۋسۋف پەن مۇحاممەدتىڭ پىكىرى بويىنشا قارت ايەلدەر بارلىق پارىز نامازداردا مەشىتكە بارا الادى", – دەلىنگەن قمدب شاريعات جانە ءپاتۋا ءبولىمىنىڭ حابارلاماسىندا.
قمدب ۇستانىمى بويىنشا، مەشىتتە ايەلدەرگە ارنالعان بولەك جەر بولسا جانە ول جەرگە بارار جول دا كوپشىلىككە كورىنبەيتىندەي بولسا، وقاسى جوق. باستى ماقسات – ايەلدىڭ ابىرويى مەن قوعامدا ءتۇرلى بۇلىكتەردىڭ تۋىنا جول بەرمەۋ.
