كوروناۆيرۋستەن ساقتانۋ ماقساتىندا قمدب جۇما نامازىنا قاتىستى مالىمدەمە جاسادى، – دەپ حابارلايدى قمدب ءباسپاسوز قىزمەتى.
كۇن ساناپ ءورشىپ بارا جاتقان دەرتتى دۇنيەجۇزىلىك دەنساۋلىق ساقتاۋ ۇيىمى پاندەميا دەپ جاريالاعان سوڭ، قازاقستاندا دا وعان قارسى شارالار بۇرىنعىدان دا كۇشەيتىلەدى.
قۇرمەتتى جاماعات!
بۇگىندە الەم جۇرتشىلىعىن دۇرلىكتىرگەن كوروناۆيرۋس كوپتەگەن ەلدەرگە تاراپ ۇلگەردى. ۆيرۋستى جۇقتىرعان ادام سانى ارتۋدا. بۇل دەرت ءبىزدى دە الاڭداتىپ وتىر.
وسىعان وراي، قازاقستان مۇسىلماندارى ءدىني باسقارماسى شاريعاتتاعى زارۋلىك ۇكىمىن نەگىزگە الا وتىرىپ، كوروناۆيرۋستىڭ جاماعات اراسىندا تارالۋىنىڭ الدىن الۋ شاراسى رەتىندە جۇما نامازىنا بايلانىستى مالىمدەيدى:
جۇما نامازىنان الدىن ايتىلاتىن 30 مينۋتتىق ۋاعىز 20.03.2020 جىلدان باستاپ ۋاقىتشا توقتاتىلادى;
ناماز ۋاقىتى كىرە سالا ازان ايتىلادى، 4 راكاعات سۇننەت وتەلىپ، جۇما نامازىنىڭ 2 راكاعات پارىزى قىسقا سۇرەمەن وقىلادى;
جۇما نامازىنىڭ پارىزىنان كەيىن وقىلاتىن 4 راكاعات سۇننەتتى ۇيدە وقۋعا كەڭەس بەرەمىز;
نامازدان كەيىن ءتاسبيح تارتىلمايدى، قۇران وقىلمايدى، يمام قىسقا دۇعا جاسايدى;
نامازدان كەيىن جاماعات قول بەرىپ، «جۇما قابىل بولسىن» دەپ امانداسپايدى;
مەشىتكە بەتپەردە (ماسكا) كيىپ كەلۋ;
نامازدان كەيىن كوپ كىدىرمەي مەشىتتەن شىعۋ;
جۇما نامازعا باليعاتقا تولماعان بالالاردى الىپ كەلمەۋ;
جۇما نامازعا دەنساۋلىعى جارامايتىن قاريالار، ناۋقاستار مەن ايەلدەردىڭ قاتىسپاعانى ابزال;
اۋا رايى قولايلى ايماقتاردا جۇما نامازىن مەشىت اۋلاسىندا وقۋعا رۇقسات.
بارشا مۇسىلمان قاۋىمىن وسى جاعدايلارعا تۇسىنىستىكپەن قاراۋعا شاقىرامىز. بۇل مالىمدەمە بۇگىننەن باستاپ، ياعني 13 ناۋرىزىنان باستاپ كۇشىنە ەنەدى.
