يمام نۇرلان بايجىگىتۇلىنىڭ پلاستيكالىق وتاعا قاتىستى ايتقان پىكىرى الەۋمەتتىك جەلىدە قىزۋ تالقىلانۋدا، دەپ حابارلايدى "ادىرنا" ۇلتتىق پورتالى.
ول سىرتقى كەلبەتتى قالپىنا كەلتىرۋگە نەمەسە دەنساۋلىققا بايلانىستى جاسالاتىن پلاستيكالىق جانە كوسمەتولوگيالىق پروتسەدۋرالارعا يسلامدا تىيىم سالىنبايتىنىن ايتتى.
يمامنىڭ سوزىنشە، بۇرىن بولعان شاشتى قايتا ەگۋ، قاباقتىڭ سالبىراۋىن تۇزەتۋ، سونداي-اق بەت كۇتىمىنە ارنالعان كەيبىر مەديتسينالىق پروتسەدۋرالاردى جاساۋعا رۇقسات بار. ونىڭ پىكىرىنشە، مۇنداي ەم-دوم تۇرلەرى ادامنىڭ دەنساۋلىعى مەن قالىپتى كەلبەتىن قالپىنا كەلتىرۋگە باعىتتالعاندىقتان، شاريعاتقا قايشى ەمەس.
بۇل مالىمدەمە قوعامدا ءتۇرلى پىكىر تۋعىزدى. الەۋمەتتىك جەلى قولدانۋشىلارىنىڭ ءبىر بولىگى يمامنىڭ كوزقاراسىن قولداپ، مەديتسينالىق قاجەتتىلىككە بايلانىستى جاسالاتىن وپەراتسيالار مەن كوسمەتولوگيالىق ەمدەردىڭ ورىندى ەكەنىن جازسا، ەندى بىرقاتارى ونىڭ پىكىرىمەن كەلىسپەيتىنىن ءبىلدىردى. كەيبىر قولدانۋشىلار مۇنداي ماسەلەلەردە شاريعات تالاپتارىن قاتاڭ ۇستانۋ قاجەت ەكەنىن العا تارتتى.
