شۆەد پوليتسياسى 2023 جىلى قۇراندى ورتەپ، بىرنەشە نارازىلىق شارالارىن ۇيىمداستىرعان 38 جاستاعى يراكتىق سالۆان موميكانىڭ قايتىس بولعانىن حابارلادى. بەس كۇدىكتى قولعا ءتۇستى، دەپ حابارلايدى “ادىرنا” ۆۆس-گە سىلتەمە جاساپ.
شۆەد باق—نىڭ جازۋىنشا، موميكانى سيودەرتەلە قالاسىندا ءوز ۇيىندە اتىپ ولتىرىلگەن. ول ءدال سول كەزدە TikTok-تا تىكەلەي ەفير جۇرگىزىپ جاتقان.
ونىڭ ءولىمى تۋرالى سوت حابارلاعاننان كەيىن بەلگىلى بولدى. بەيسەنبى كۇنى وعان «ۇلتتىق توپقا قارسى ۇگىت-ناسيحات جۇرگىزۋ» ايىبى بويىنشا شەشىم شىعۋى ءتيىس ەدى. ايىپتاۋشىلاردىڭ نۇسقاسى بويىنشا، موميكا مەن ونىڭ سەرىگى سالۆان نادجەم تەك قۇراندى ورتەپ قانا قويماي، مۇسىلماندارعا قاتىستى قورلايتىن سوزدەر ايتقان.
سوت شەشىم قابىلداۋدى 3 اقپانعا دەيىن كەيىنگە قالدىردى، سەبەبى «سالۆان موميكا قايتىس بولعاندىقتان، ۇكىم شىعارۋعا قوسىمشا ۋاقىت قاجەت». بۇعان دەيىن سيودەرتەلە قالاسىندا اتىس بولعانى جانە دەنەسىندە وق جاراقاتتارى بار ەر ادامنىڭ اۋرۋحانادا كوز جۇمعانى حابارلانعان بولاتىن. كەيىن پوليتسيا قازا تاپقان ادامنىڭ موميكا ەكەنىن راستادى.
سالۆان نادجەم X الەۋمەتتىك جەلىسىندە موميكانىڭ ءولىمى تۋرالى جاڭالىقتان كەيىن، «مەن كەلەسى بولامىن» دەپ جازبادى.
موميكا 2018 جىلى يراكتان شۆەتسياعا كوشىپ كەلگەن. 2021 جىلى ول ءۇش جىلعا سوزىلاتىن تۇرۋ ۆيزاسىن العان. ءوزىنىڭ X الەۋمەتتىك جەلىسىندەگى اككاۋنتىندا ول ءوزىن ارامەي تىلىندە سويلەيتىن اسسيريالىق دەپ تانىستىرىپ، كاتوليكتىك وتباسىندا وسكەنىن ايتقان.
2023 جىلى موميكا يسلامعا قارسى بىرنەشە نارازىلىق اكتسيالارىن ۇيىمداستىردى. ونىڭ العاشقى اكتسياسى ستوكگولمدەگى باستى مەشىتتىڭ جانىندا، مۇسىلمانداردىڭ يد ال-ادحا مەيرامى (كەيبىر ەلدەردە كۋربان-بايرام دەپ اتالادى) كۇنى ءوتتى. بۇل اكتسيا پوليتسيامەن كەلىسىلگەن جانە كۇزەتىلگەن بولاتىن.
«مەن ستوكگولمداعى ۇلكەن مەشىتتىڭ الدىندا نارازىلىق وتكىزبەكشىمىن جانە قۇرانعا قاتىستى ءوز كوزقاراسىمدى بىلدىرگىم كەلەدى. مەن ونى جىرتىپ، ورتەيمىن»، - دەپ جازدى موميكا پوليتسياعا بەرگەن وتىنىشىندە.
باستاپقىدا پوليتسيا اكتسياعا كەلىسۋدەن باس تارتتى، بىراق ۇيىمداستىرۋشىلار اپەللياتسيالىق سوتقا جۇگىنىپ، سوت ولاردىڭ ءوتىنىشىن زاڭدى دەپ تانىدى، ناتيجەسىندە ەكى اپتادان كەيىن سوت شەشىمىمەن رۇقسات بەرىلدى.
موميكا يراك ەلشىلىگى الدىندا دا وسىعان ۇقساس اكتسيا وتكىزگەن. ول ءوزىنىڭ نارازىلىق شارالارى مۇسىلماندارعا ەمەس، تەك يسلامعا باعىتتالعانىن، ءارى ولاردىڭ ماقساتى شۆەتسيا حالقىنا قۇرانداعى حابارلاردان قورعانۋ ەكەنىن ايتتى.
شۆەتسيادا قۇراندى دەمونستراتيۆتى تۇردە ورتەگەندەر بۇعان دەيىن دە بولعان، بىراق ولار ۋلتراوڭشىلدار بولعان. ەندى بۇل وقيعا ەلدىڭ يسلام الەمىمەن قارىم-قاتىناسىن قيىنداتتى. ساۋد ارابياسى، يراك، يران، ماروككو جانە باسقا دا مۇسىلمان ەلدەرى شۆەد بيلىگىنىڭ ارەكەتىن ايىپتاپ، مالىمدەمەلەر جاسادى. ماروككو ءوز ەلشىسىن كەرى شاقىرۋدى شەشتى، ال يراك سىرتقى ىستەر مينيسترلىگى موميكانى ەكستراديتسيالاۋدى تالاپ ەتتى. يراكتاعى نارازىلىقتار بارىسىندا دەمونسترانتتار شۆەد ەلشىلىگىن ەكى رەت باسىپ كىرىپ، ەكىنشى رەت ەلشىلىك عيماراتتارىن ورتەدى.
شۆەد بارلاۋ قىزمەتى تەرروريستىك قاۋىپ دەڭگەيىن 1-دەن 5-كە دەيىنگى دەڭگەي بويىنشا تورتكە كوتەردى، ال پوليتسيا بولاشاقتا قاسيەتتى كىتاپتاردى ورتەيتىن وتىنىشتەردى قابىلداماۋدى باستادى — سونىڭ ىشىندە تورا مەن ءىنجىلدى ورتەۋدى جوسپارلاعاندار بولسا دا.
شۆەتسيا ۇكىمەتى موميكانىڭ اكتسياسىنان كەيىن قاسيەتتى كىتاپتاردى قورلاۋ ارەكەتىن ايىپتادى، بىراق ءسوز بوستاندىعى مەن جينالىس قۇقىعى كونستيتۋتسيالىق تۇردە قورعالاتىنىن اتاپ ءوتتى. الايدا 2023 جىلدىڭ قازان ايىندا 2020 جىلى قۇراندى ورتەگەنى ءۇشىن العاش رەت ايىپتاۋ ۇكىمى شىعارىلدى. لينچيوپينگ قالاسىنىڭ اۋداندىق سوتى 27 جاستاعى ەر ادامدى «ەتنيكالىق توپقا قارسى ۇگىت-ناسيحات جۇرگىزۋ» ايىبى بويىنشا كىنالى دەپ تاۋىپ، وعان شارتتى جازا تاعايىندادى.
موميكا مەن ونىڭ نارازىلىقتارىن ۇيىمداستىرۋشى سەرىگى سالۆان نادجەمگە دە وسىنداي ايىپ تاعىلدى. ولاردىڭ ىسىندە ءتورت ءىس بار.
موميكا شۆەتسيادان دەپورتاتسيالانۋعا جاقىن بولدى: كوشى-قون اگەنتتىگى ول باسپانا سۇراعان كەزدە جالعان اقپارات بەرگەنىن انىقتادى. ونىڭ تۇرۋ ۆيزاسى قايتارىلدى. دەپورتاتسيالاۋ بۇيرىعى شىعارىلدى، بىراق قاۋىپسىزدىك سەبەپتەرىمەن ول توقتاتىلعان.
اگەنتتىك وكىلى يەسپەر تەنگروتتىڭ ايتۋىنشا، «بۇل ادام تۋعان ەلىنە قايتسا، ازاپتالۋى جانە ادامدىق قادىر-قاسيەتىنە نۇقسان كەلتىرىلۋى مۇمكىن، سوندىقتان ءبىز دەپورتاتسيالاۋ ءۇشىن كەدەرگى بار دەپ شەشتىك». سونىڭ ناتيجەسىندە موميكا جاڭا تۇرۋ ۆيزاسىن الدى.
