باس پروكۋراتۋرا شۆەتسيادان قازاقستاندا الاياقتىق جاسادى دەگەن كۇدىكتىنى ەكستراديتسيالادى، دەپ حابارلايدى “ادىرنا” ۇلتتىق پورتالى.
اقپارات بويىنشا، 2019 جىلدىڭ تامىز ايىندا الماتىدا وزدەرىن ۇلتتىق قاۋىپسىزدىك ورگاندارىنىڭ قىزمەتكەرلەرىمىز دەپ تانىستىرعان ءبىر توپ ادام كاسىپكەر ىسىنە تەكسەرۋ جۇرگىزىپ، قىلمىستىق جاۋاپتىلىققا تارتامىز دەگەن جەلەۋمەن 30 مىڭ اقش دوللارى كولەمىندەگى قاراجاتتى جىمقىرماق بولعان.
ولاردىڭ ارەكەتتەرىنىڭ جولىن كەسۋ كەزىندە، بىرەۋى قىلمىستىق قۋدالاۋ ورگاندارىنان جاسىرىنىپ ۇلگەرگەن، سوندىقتان ول حالىقارالىق ىزدەۋگە جاريالاندى. كەيىننەن قازاقستان تاراپىنىڭ ءوتىنىشى بويىنشا ونى شۆەتسيا كورولدىگىنىڭ قۇقىق قورعاۋ ورگاندارى ستوكگولم قالاسىندا ۇستادى. باس پروكۋراتۋراسى مەن ءىىم ينتەرپول قىزمەتكەرلەرى، سىرتقى ىستەر مينيسترلىگىنىڭ قولداۋىمەن كۇدىكتى قازاقستانعا جەتكىزىلدى، دەلىنگەن حابارلامادا.
قازىرگى ۋاقىتتا ول استانا قالاسىنىڭ تەرگەۋ يزولياتورىنا قامالدى.
اتالعان قىلمىستى جاساعانى ءۇشىن وسىعان تەكتەس قىلمىس جاساعاندار مۇلكى تاركىلەنىپ، 5 جىلدان 10 جىلعا دەيىن باس بوستاندىعىنان ايىرۋ جازاسىنا كەسىلۋى مۇمكىن.
