استانا – ماسكەۋ باعىتى بويىنشا ۇشقان رەيستە 85 جاستاعى جولاۋشىنىڭ جاعدايى كۇرت ناشارلاپ، شۇعىل مەديتسينالىق كومەك قاجەت بولدى، دەپ حابارلايدى "ادىرنا" ۇلتتىق پورتالى قر دەنساۋلىق ساقتاۋ مينيسترلىگىنە سىلتەپ.
مينيسترلىك بۇل تۋرالى 29 قاڭتاردا مالىمدەگەن.
24 قاڭتار كۇنى ۆيكتور كارپين ەسىمدى جولاۋشى نەمەرەسىمەن بىرگە ۇشىپ بارا جاتقان كەزدە ءوزىن جايسىز سەزىنىپ، ەسىنەن تانا باستاعان. بورتسەرىكتەر جاعدايدى بايقاپ، شۇعىل تۇردە دارىگەردى شاقىردى. سول كەزدە ۇشاق ىشىندە بولعان دارىگەر، استانا قالاسىنىڭ بسم ۋدپ رك وتونەۆرولوگى كارلىگاش باكيروۆا كومەك كورسەتۋگە كىرىستى.
تەكسەرۋ بارىسىندا جولاۋشىنىڭ قان قىسىمى 50/30 مم رت. ست. دەڭگەيىنە دەيىن تومەندەپ، تامىرى ءالسىز سوققانى انىقتالدى. دارىگەر شۇعىل رەانيماتسيالىق شارالار، ونىڭ ىشىندە جۇرەك-وكپە رەانيماتسياسىن (سلر) جۇرگىزىپ، ناۋقاستىڭ جاعدايىن ۋاقىتشا تۇراقتاندىردى. سونىمەن قاتار، ۇشاقتى شۇعىل تۇردە جاقىن ماڭداعى اۋەجايعا قوندىرۋدى تالاپ ەتتى. ەكيپاج جاعدايدىڭ اۋىرلىعىن ەسكەرىپ، ۋفا قالاسىنداعى اۋەجايعا قونۋ تۋرالى شەشىم قابىلدادى. جەرگە قونعان سوڭ، ۆيكتور الەكسەەۆيچتى مەديتسينالىق قىزمەتكەرلەر كۇتىپ الىپ، اۋرۋحاناعا جەتكىزدى. كەيىننەن ونىڭ جاعدايى تۇراقتالعانى حابارلاندى.
ايتا كەتەيىك، بۇل – وسى ايداعى ەكىنشى جاعداي، وندا استانا مەديتسينالىق ۋنيۆەرسيتەتىنىڭ تۇلەكتەرى اۋە بورتىندا ادام ءومىرىن قۇتقاردى. بۇعان دەيىن ينتەرن دىنمۇحامەد بەكتۇرعانوۆ قىزىلوردا – استانا رەيسىندە جولاۋشىعا جۇرەك-وكپە رەانيماتسياسىن جاساپ، ونىڭ ءومىرىن ساقتاپ قالعان ەدى.
