استانالىق تۇرعىن اسكەرگە شاقىرىلعان ۇلىنىڭ دەنساۋلىعىنا الاڭداپ، پرەزيدەنتتەن كومەك سۇرادى، دەپ حابارلايدى "ادىرنا" ءتىلشىسى.
ايەلدىڭ ايتۋىنشا، بالاسىنىڭ مەديتسينالىق تەكسەرۋى تولىق اياقتالماي جاتىپ، ونى اسكەري كوميسسارياتتا قالدىرعان. كەيىن جاعدايعا قاتىستى تۇسىنىكتەمە بەرگەن انا ۇلىنىڭ قازىر وزىمەن بىرگە ەكەنىن جانە شاعىمى جوق ەكەنىن ايتتى.
گۇلجانات يۋپيتەرقىزىنىڭ سوزىنشە، ۇلىنا 8 قازاندا اسكەرگە شاقىرۋ قاعازى كەلگەن. 12 قازاندا ول بالاسىن استاناداعى بايقوڭىر اۋدانىنىڭ اسكەري كوميسسارياتىنا ءوزى اپارعان. ايەلدىڭ ايتۋىنشا، 2025 جىلعى قىركۇيەكتە ۇلىنىڭ دەنساۋلىعىنا بايلانىستى اسكەرگە شاقىرۋ التى ايعا كەيىنگە قالدىرىلعان. سول كەزدە دارىگەرلەر ءوت قابىنان پوليپتەر مەن جەدەل گاستريت انىقتاعان. كەيىنگى ۋلترادىبىستىق زەرتتەۋ كەزىندە جۇرەگىنە قاتىستى دا اۋىتقۋلار بايقالعان. اناسىنىڭ ايتۋىنشا، اسكەري كوميسسارياتتا ۇلىن كازارمادا قالدىرىپ، تەلەفونىن الىپ قويعان. ول بىرنەشە ساعات بويى جاۋاپتى قىزمەتكەرلەردەن تۇسىنىكتەمە الۋعا تىرىسقانىمەن، ناقتى جاۋاپ الا الماعانىن ايتتى. سونداي-اق ۇلىن شىمكەنتكە نەمەسە وتارعا جىبەرۋى مۇمكىن ەكەنىن ەستىگەن.
ايەل ۇلىن اسكەردەن بوساتۋدى تالاپ ەتپەيتىنىن، تەك دەنساۋلىعىنا قاتىستى تەكسەرۋ تولىق جۇرگىزىلىپ، شەشىم زاڭعا سايكەس قابىلدانۋىن قالايتىنىن جەتكىزگەن.
كەيىنىرەك گۇلجانات يۋپيتەرقىزى جاعدايعا قاتىستى قوسىمشا مالىمدەمە جاسادى. ونىڭ ايتۋىنشا، مەديتسينالىق كوميسسيانىڭ جۇمىسى اياقتالماعاندىقتان، ۇلى قوسىمشا تەكسەرۋدەن وتكەن. وعان دارىگەرلەرگە قارالۋ ءۇشىن جولداما بەرىلگەن. استانا تۇرعىنى ۇلىنىڭ قازىر جانىندا ەكەنىن ايتىپ، جاعدايعا جەدەل نازار اۋدارعانى ءۇشىن قورعانىس مينيسترلىگىنە العىس ءبىلدىردى. سونداي-اق ەشقانداي شاعىمى جوق ەكەنىن مالىمدەدى.
ەسكەرتۋ جانە الدىن الۋ: استانادا جاستار اراسىنداعى ەسىرتكى قىلمىسىنا قارسى كۇرەس شارالارى تالقىلاندى
