رەسەي پرەزيدەنتى ۆلاديمير پۋتين ۆلاديمير زەلەنسكيمەن كەلىسسوزدەر جۇرگىزۋ ءۇشىن ارنايى ادامداردى تاعايىنداۋعا دايىن ەكەنىن مالىمدەدى، دەپ حابارلايدى "ادىرنا" ۇلتتىق پورتالى ريا نوۆوستي-عا سىلتەمە جاساپ.
پۋتين بۇل تۋرالى «ماسكەۋ. كرەمل. پۋتين» باعدارلاماسىنىڭ اۆتورى پاۆەل زارۋبينگە بەرگەن سۇحباتىندا ايتتى.
ول ەگەر زەلەنسكي كەلىسسوزدەرگە قاتىسقىسى كەلسە، وندا بۇل جۇمىسقا ارنايى وكىلدەر مەن كەلىسسوز جۇرگىزۋشىلەردى بولەتىنىن مالىمدەدى.
"قۇجاتتارعا تۇپكىلىكتى قول قويۋ ماسەلەسى - ۋكراينانىڭ دا، رەسەيدىڭ دە قاۋىپسىزدىگىنە ۇزاق ۋاقىت كەپىلدىك بەرەتىن وتە كۇردەلى ماسەلە. مۇندا بىردە-ءبىر قاتەلىك، بىردە-ءبىر اقاۋ بولماۋى ءتيىس. ءبارى ءدال، ۇيلەسىمدى بولۋى كەرەك. ۋكراينا كونستيتۋتسياسىنا سايكەس، ۋكراينا پرەزيدەنتى سوعىس جاعدايىندا دا ءوزىنىڭ وكىلەتتىكتەرىن باسقا بىرەۋگە بەرۋ قۇقىعىنا يە ەمەس. وكىلەتتىكتەردى تەك بيلىك ورگاندارىنىڭ وكىلدەرى، ياعني ەل پارلامەنتى بەرە الادى. بىراق ەگەر كەلىسسوزدەر جۇرگىزۋگە نيەت بولسا، كەز كەلگەن ادام قاتىسىپ، كومپروميستىك شەشىمدەر تابۋعا بولادى. ءبىز ءوزىمىزدىڭ مۇددەمىزگە سايكەس كەلەتىن شەشىمدەرگە قول جەتكىزۋگە تىرىسامىز" - دەدى رەسەي پرەزيدەنتى.
سونىمەن قاتار، پۋتين قازىرگى جاعدايدا كەلىسسوزدەردىڭ زاڭسىز بولاتىنىن ايتتى.
"زەلەنسكي قول قويعان كەزدە زاڭدى پرەزيدەنت بولعان. بىراق قازىر ونىڭ زاڭدىلىعى جوق. بۇل ماسەلە قيىندىق تۋعىزۋى مۇمكىن، بىراق ەگەر ولار زاڭدى جولمەن كەلىسسوزدەر جۇرگىزۋدى قالاسا، ونى جاساۋعا مۇمكىندىكتەر بار" - دەدى ول.
