بۇگىن، 28 قاڭتار – تاۋەلسىز قازاقستاننىڭ تۇڭعىش كونستيتۋتسياسى قابىلدانعان كۇنى، دەپ حابارلايدى “ادىرنا” ۇلتتىق پورتالى.
1993 جىلى قاڭتاردىڭ 28-دە تاۋەلسىز قازاقستاننىڭ تۇڭعىش كونستيتۋتسياسىنىڭ تالقىلاۋ جانە قابىلداۋ جونىندەگى جۇمىستارى اياقتالعان بولاتىن. سول كۇنى جوعارعى كەڭەستەگى 312 دەپۋتاتتىڭ 309-ى قازاقستاننىڭ تۇڭعىش كونستيتۋتسياسىن قابىلداۋ جونىندەگى ۇسىنىستى قولداپ، داۋىس بەردى جانە ەكس-پرەزيدەنتى نۇرسۇلتان نازارباەۆقا تۇڭعىش كونستيتۋتسيانىڭ تۇپنۇسقا ءماتىنى تابىس ەتىلگەن ەدى.
سول كۇنى كەشكىسىن تاۋەلسىز قازاقستاننىڭ تۇڭعىش كونستيتۋتسياسىنىڭ قابىلدانۋىنا ارنالعان جوعارعى كەڭەستىڭ سالتاناتتى ءراسىمى ءوتتى. ءراسىمدى اشقان جوعارعى كەڭەس توراعاسى سەرىكبولسىن ءابدىلدين جاڭا كونستيتۋتسيانىڭ تۇپنۇسقاسىن سول كەزدەگى قازاقستان پرەزيدەنتى نۇرسۇلتان نازارباەۆقا، قازاق سسر-ءىنىڭ 1978 جىلى قابىلدانعان كونستيتۋتسياسىنىڭ تۇپنۇسقاسىن ورتالىق مۋزەي باسشىسىنا تاپسىردى. قاڭتاردىڭ 28-ءى كونستيتۋتسيا كۇنى – مەملەكەتتىك مەرەكە بولىپ بەلگىلەندى.
بىراق ۋاقىت وتە كەلە تۇڭعىش كونستيتۋتسيانىڭ كەيبىر تۇستارى نارىقتىق قوعامداعى وزگەرىستەرگە سايكەس بولماي شىققانى بايقالىپ، ەكى جىل وتكەننەن كەيىن قولدانىستا جۇرگەن قازىرگى كونستيتۋتسيا قابىلداندى. 1995 جىلعى 30-تامىزدا جاڭا كونستيتۋتسيا ومىرگە كەلگەننەن بەرى 1993 جىلعى قاڭتاردىڭ 28-ىندە قابىلدانعان قر كونستيتۋتسياسىنىڭ ءماتىنى مەملەكەتتىك مۇراجايدا ساقتالىپ تۇر.
