قازاقستاندا العاشقى اەروتاكسي مامىر ايىندا سىناقتان وتەدى

فوتو: اااG 

قازاقستاندا قالالىق اۋە موبيلدىلىگى (Urban Air Mobility, UAM) باعىتى جاڭا كەزەڭگە قادام باسۋدا. مامىر ايىنىڭ سوڭىندا Alatau Advance Air Group كومپانياسى ەلدە العاش رەت eVTOL – تىك ۇشىپ-قونۋ جاسايتىن ەلەكترلى اۋە اپپاراتى نەگىزىندەگى اەروتاكسيدىڭ دەمونستراتسيالىق ۇشۋىن وتكىزۋدى جوسپارلاپ وتىر. بۇل تۋرالى كومپانيا «كۋرسيۆكە» بەرگەن سۇحباتىندا مالىمدەگەن، دەپ حابارلايدى "ادىرنا".

كومپانيا وكىلدەرىنىڭ ايتۋىنشا، 8 مامىردا مەملەكەت باسشىسى قاسىم-جومارت توقاەۆ الاتاۋ قالاسىنىڭ ارنايى مارتەبەسى تۋرالى زاڭعا قول قويعان. بۇل قالا ءۇشىن ارنايى قۇقىقتىق رەجيم قالىپتاستىرۋعا نەگىز بولىپ وتىر.

سول سەبەپتى الاتاۋ قالاسى قالالىق اۋە موبيلدىلىگى (Urban Air Mobility, UAM) ءۇشىن ەرەكشە الاڭ رەتىندە قاراستىرىلۋدا. سەبەبى جاڭا قالا ينفراقۇرىلىمدى نولدەن باستاپ جوسپارلاۋعا مۇمكىندىك بەرەدى.

جوسپارعا مىنالار ەنگىزىلۋى مۇمكىن:

• ۆەرتيپورتتار (ۇشۋ-قونۋ الاڭدارى)

• اۋە دالىزدەرى

• تومەن بيىكتىكتەگى قوزعالىستى تسيفرلىق باسقارۋ جۇيەسى

• Smart City ينفراقۇرىلىمىمەن ينتەگراتسيا

• كولىك حابتارى اراسىنداعى باعىتتار

مامانداردىڭ ايتۋىنشا، بۇل ءتاسىل جاڭا كولىك جۇيەسىن جىلدام ەنگىزۋگە جول اشادى.

2026 جىلى الماتى اگلومەراتسياسىندا پيلوتتىق باعىتتاردى ىسكە قوسۋ جوسپارلانعان. ۆيتسە-پرەمەر قانات بوزىمباەۆتىڭ ايتۋىنشا، اۋە كولىگى الماتى، الاتاۋ جانە الماتى وبلىسى اۋماعىندا 320–340 كم/ساع جىلدامدىقپەن قاتىناي الادى.

مىسالى، الماتىدان مەدەۋگە دەيىن شامامەن 10–12 مينۋتتا جەتۋگە بولادى.

2026 جىلدان باستاپ قازاقستاندا ۆەرتيپورتتار جەلىسىن سالۋ باستالادى. جوبا Alatau Advance Air Group كومپانياسى مەن حالىقارالىق سەرىكتەستەر – يتاليالىق UrbanV جانە وڭتۇستىك كورەيانىڭ Korean Airports Corporation ۇيىمدارىنىڭ قاتىسۋىمەن جۇزەگە اسادى.

• AutoFlight (قىتاي) – 2026 جىلى تەستتىك ۇشۋلار جوسپارلانعان

  • جىلدامدىعى: 200 كم/ساع

  • 4 جولاۋشى + ۇشقىش

  • قاشىقتىعى: 250 كم

• Joby Aviation S-4 (اقش) – 2028 جىلدان باستاپ جەتكىزىلەدى

  • 4 جولاۋشى + ۇشقىش

  • قاشىقتىعى: 160–241 كم

  • جىلدامدىعى: 320 كم/ساع دەيىن

بارلىق العاشقى سىناقتار جولاۋشىسىز وتەدى.

مامانداردىڭ پىكىرىنشە، eVTOL نارىعى ءالى تولىق قالىپتاسپاعان. سوندىقتان جاڭا زاڭناما مەن ينفراقۇرىلىمدى ەرتە ەنگىزگەن ەلدەر ارتىقشىلىققا يە بولادى.

قازاقستان ءۇشىن بۇل – ورتالىق ازياداعى العاشقى قالالىق اۋە موبيلدىلىگى (UAM) رەگۋلياتورلىق الاڭىنا اينالۋ مۇمكىندىگى.

ايتا كەتسەك، 2025 جىلدىڭ قاراشاسىندا قازاقستاننىڭ تسيفرلىق دامۋ مينيسترلىگى، Joby Aviation, Alatau Advance Air Group جانە كاسىپكەر ۆياچەسلاۆ كيم اراسىندا شامامەن 300 ملن دوللارلىق اەروتاكسي جۇيەسىن قۇرۋ جونىندە مەموراندۋمعا قول قويىلعان.