كولۋمبيا پرەزيدەنتى گۋستاۆو پەترو اقش-تان دەپورتاتسيالانعان كولۋمبيالىقتاردى ەلگە قايتارۋ ءۇشىن پرەزيدەنت ۇشاعىن ۇسىندى. بۇل تۋرالى 26 قاڭتاردا مەملەكەت باسشىسى كەڭسەسىنىڭ وكىلدەرى ايتتى، دەپ حابارلايدى «ادىرنا» ءتىلشىسى.
بۇعان دەيىن پەترو ميگرانتتارعا تولى امەريكالىق اسكەري ۇشاقتاردى قابىلداۋدان باس تارتقان ەدى.
«اقش ميگرانتتاردى كەرى قايتارعىسى كەلسە، بۇل قادامدى ەلىمىزگە قۇرمەت جاساي وتىرىپ ىستەۋى ءتيىس. ءبىز ءوز ازاماتتارىمىزدى قابىلداۋعا دايىنبىز. ولار ازاماتتىق اۆياتسيا ۇشاقتارىمەن كەلۋى ءتيىس»،— دەدى باسشى «ح» جەلىسىندە.
كولۋمبيا ميگرانتتاردى قابىلداۋدان باس تارتقاننان كەيىن اقش بۇل ەلگە بىرقاتار سانكتسيا ەنگىزگەن بولاتىن. اتاپ ايتساق، پرەزيدەنت دونالد ترامپ كولۋمبيانىڭ بارلىق تاۋارىنا 25% باج سالىعىن سالۋدى، ەلدىڭ شەنەۋنىكتەرى مەن ولاردىڭ بارلىق وداقتاسى مەن جاقتاسى ءۇشىن ساياحاتقا تىيىم سالۋدى جانە ۆيزالاردى دەرەۋ جويۋدى تاپسىردى.
ەسكە سالايىق، 25 قاڭتاردا اقش زاڭسىز ميگرانتتاردى دەپورتاتسيالاۋ ناۋقانى باستالعانىن ايتىپ، العاشقى 79 ميگرانت گۆاتەمالاعا قايتارىلعانىن مالىمدەگەن ەدى.
