قىستا اۆتوكولىك ءنومىرىن قار جاپقان جۇرگىزۋشىلەر 20 مىڭ تەڭگە كولەمىندە ايىپپۇل ارقالايدى، دەپ حابارلايدى "ادىرنا" ۇلتتىق پورتالى ماسساگەتكە سىلتەپ.
اكىمشىلىك قۇقىق بۇزۋشىلىق تۋرالى كودەكستىڭ 590-بابىنىڭ 1-بولىگىنە سايكەس، كولىك قۇرالدارىن پايدالانۋ ەرەجەلەرىن بۇزۋ، اتاپ ايتقاندا، وقىلمايتىن نەمەسە سايكەس كەلمەيتىن مەملەكەتتىك تىركەۋ نومىرلەرىمەن كولىك جۇرگىزۋ – ايىپپۇل سالۋعا نەگىز بولادى.
2025 جىلى ايلىق ەسەپتىك كورسەتكىش (اەك) مولشەرى 3 932 تەڭگە بولىپ بەكىتىلگەن. وسىعان بايلانىستى، بەس اەك مولشەرىندە ايىپپۇل سوماسى 19 660 تەڭگەنى قۇرايدى.
ساراپشىلاردىڭ ايتۋىنشا، كولىك نومىرلەرىن قاردان، مۇزدان نەمەسە لاستان ۋاقىتىلى تازالاۋ جۇرگىزۋشىنىڭ جولداعى قاۋىپسىزدىگى مەن باسقا قاتىسۋشىلار ءۇشىن ماڭىزدى. سونىمەن قاتار، كولىكتىڭ ءنومىرى وقىلماسا، بۇل باقىلاۋ كامەرالارى ارقىلى جول ەرەجەسىن قاداعالاۋدى قيىنداتۋى مۇمكىن.
ايتا كەتەيىك، كولىك يەلەرى زاڭ بۇزۋشىلىققا جول بەرمەۋ ءۇشىن كۇندەلىكتى كولىكتەرىنىڭ تەحنيكالىق جاعدايىن، سونىڭ ىشىندە مەملەكەتتىك ءنومىردىڭ كورىنۋىن تەكسەرىپ وتىرۋى قاجەت.
