استانادا قالاسىنىڭ جۇمىسپەن قامتۋ باسقارماسى ازاماتتارعا كومىر الۋ ءۇشىن 50 مىڭ تەڭگەدەن بەرىپ جاتىر. ارنايى جاردەماقىنى تاپقان تابىسى كۇنكورىس دەڭگەيىنە جەتپەيتىن، ءتورت ساناتقا كىرەتىن ازاماتتار الا الادى. جاردەماقىعا قول جەتكىزۋ ءۇشىن جۇمىسپەن قامتۋ باسقارماسىنا حابارلاسۋ قاجەت. الەۋمەتتىك ناۋقان كەلەسى جىلدىڭ 30 ساۋىرىنە دەيىن جالعاسادى، دەپ حابارلايدى "ادىرنا" ۇلتتىق پورتالى "Qazaqstan" تەلەارناسىنا سىلتەمە كەلتىرىپ.
استانانىڭ 40-بەكەتى ماڭىندا ورنالاسقان كومىر ساتاتىن قويما مەڭگەرۋشىسى:
«ءبىز تامىزدان باستاپ ساتىپ جاتىرمىز، سونىڭ اسەرىنەن قازىر داۋرىعۋ جوق. كومىردى كوپ حالىق الدى»، – دەپ پىكىر ءبىلدىردى.
قويما مەڭگەرۋشىسىنىڭ ايتۋىنشا، ۆاگوندار كەمى ەكى كۇن سايىن كەلىپ جاتىر. بىراق، ساتىپ الۋشىلار شۇباركول كومىرىنىڭ از ەكەنىنە شاعىمدانعان.
تەلەارنانىڭ حابارلاۋىنشا، 40-ستانتسيا تۇيىعىنا بۇگىن عانا جەتكىزىلگەن 300 توننا كومىر مىنە، 1 ساعاتتا ساتىلىپ كەتتى. ال، نەگىزى قازاقستاندىقتار جىلىنا 10 ملن توننا كومىر تۇتىنادى. سونىڭ ىشىندە شۇباركولگە سۇرانىس كوپ. بىراق شۇباركولدە جىلىنا 3 جارىم ملن توننا شىعارىلادى. سوندىقتان كەيدە كومىر جەتپەي جاتادى.
تەمىرجول تۇيىقتارىندا شۇباركول كومىرىنىڭ باعاسى – 13 850 تەڭگە. جىبەك جولى، تالاپكەر، قوسشى، قوياندى جانە ارشالىعا جەتكەنشە تاسىمالداۋ قۇنى قوسىلىپ، قىمباتتايدى.
كومىر باعاسىنىڭ قۇبىلۋى مەن ارتۋىنا قاتىستى تاسىمالداۋشىلار دا پىكىر بىلدىرگەن. ماسەلەن:
- جەتكىزۋ عوي بىزدە. قالانىڭ سىرتى بولسا 20-25 مىڭ، الىستاعان سايىن قىمباتىراق بولادى. قوسشى، قوياندىعا قانشاعا اپاراسىز وسى جەردەن؟ مەن جىبەك جولىنا اپارام، ارعى جاعى 25 بەرگى جاعى 20 مىڭعا، – دەپ جاۋاپ بەردى تاسىمالداۋشى باعدات مامىراەۆ.
"ادىرنا" ۇلتتىق پورتالى
